22 ساۋىردە ەنەرگەتيكا ءمينيسترى ەرلان اقكەنجەنوۆ رەسەي ارقىلى گەرمانياعا جەتكىزەلەتىن مۇناي ءترانزيتىنىڭ توقتاتىلۋى تۋرالى اقپاراتتى راستادى، دەپ حابارلايدى «ادىرنا» ءتىلشىسى.
ول رەسەيدىڭ رەسمي مالىمدەمە جاساماعانىن مالىمدەمەدى.
«بەيرەسمي دەرەككوزدەر ارقىلى بۇنىڭ شىندىق ەكەنىن ءبىلىپ وتىرمىز. مامىر ايىندا اتىراۋ-سامارا ارقىلى ءارى قاراي «دوستىق» مۇناي قۇبىرىمەن «شۆەد» زاۋىتىنا باعىتتالاتىن ترانزيت بىزدە نولدىك دەڭگەيدە. رەسەي تاراپى، تاعى دا بەيرەسمي اقپاراتقا سۇيەنسەك، قازاقستاندىق مۇنايدى ايداۋعا تەحنيكالىق مۇمكىندىكتىڭ جوق ەكەنىن مالىمدەۋدە. بۇل، ءسىرا، جاقىندا رەسەيلىك ينفراقۇرىلىمعا جاسالعان سوققىلارمەن بايلانىستى بولۋى مۇمكىن. مەن وسىنداي بولجام جاساپ وتىرمىن»، — دەدى اقكەنجەنوۆ استانادا وتكەن ەكولوگيالىق سامميت كۋلۋارىندا.
مينيستر ەكىنشى توقسانعا ارنالعان ينديكاتيۆتىك كورسەتكىشتەر دە نولدىك كولەمدى قاراستىراتىنىن اتاپ ءوتتى.
«دەگەنمەن، كەي ارىپتەستەرىممەن سويلەستىم. ەسىمدەرىن اتاماي-اق قويايىن. تەحنيكالىق مۇمكىندىك ماسەلەسى شەشىلگەن بويدا قازاقستاندىق مۇناي ءترانزيتى قايتا جاندانادى»، — دەپ سەندىردى ول.
ەسكە سالايىق، 21 ساۋىردە رەسەي 1 مامىردان باستاپ «دوستىق» قۇبىرى ارقىلى قازاقستاننان گەرمانياعا مۇناي ەكسپورتىن توقتاتۋدى جوسپارلاپ وتىرعانى بەلگىلى بولدى. بۇل تۋرالى Reuters اگەنتتىگىنە سالالىق ءۇش دەرەككوز حابارلاعان. ولاردىڭ مالىمەتىنشە، جەتكىزىلىمنىڭ جاڭارتىلعان كەستەسى قازاقستان مەن گەرمانياعا جولدانعان.
قازاقستان 2023 جىلدان بەرى گەرمانياعا مۇنايدى «دوستىق» قۇبىرى ارقىلى جەتكىزىپ كەلەدى. 2025 جىلدىڭ قورىتىندىسى بويىنشا جەتكىزىلىم كولەمى 2,1 ملن توننانى قۇرادى، ال 2026 جىلى ول 2,5 ملن تونناعا دەيىن وسەدى دەپ كۇتىلۋدە. قازاقستان مۇنايى «وزەن — اتىراۋ — سامارا» ماگيسترالدىق مۇناي قۇبىرى ارقىلى تاسىمالدانىپ، كەيىن «ترانسنەفت» جۇيەسىنە تۇسەدى جانە ءارى قاراي گەرمانياداعى شۆەدت قالاسىنداعى مۇناي وڭدەۋ زاۋىتىنا جەتكىزۋ ءۇشىن «اداموۆا زاستاۆا» تاپسىرۋ پۋنكتىنە باعىتتالادى. شيكىزات قاراشىعاناق، قاشاعان جانە تەڭىز كەن ورىندارىنان KEBCO برەندىمەن جەتكىزىلەدى.
