الماتى قالاسىندا ALMA LOVE 2026 جاستار فەستيۆالىنىڭ ءوز باستاۋىن الدى. فەستيۆالدىڭ العاشقى كۇنى تامىزدىڭ 2-ءسى جالپىحالىقتىق«تازا قازاقستان» باستاماسى اياسىندا ۇيىمداستىرىلعان EcoDay ەكولوگيالىق اكتسياسىمەن باستالدى. قالانىڭ ءارتۇرلى اۋداندارىندا وتكەن ەكولوگيالىق ءىس-شارالارعا 600-دەن استام جاس قاتىستى.
فەستيۆالدىڭ العاشقى كۇنى جاستار ۇيىمدارى، ەرىكتىلەر، بەلسەندى جاستار جانە قالا تۇرعىندارى ورتاق ماقساتقا بىرىگىپ، ALMA LOVE فەستيۆالىن تۋعان قالاعا دەگەن جاناشىرلىقتان باستادى. قاتىسۋشىلار اۋلالار مەن قوعامدىق كەڭىستىكتەردى تازالاپ، ەكولوگيالىق چەللەندجتەر ۇيىمداستىرىپ، تۇرعىنداردى قورشاعان ورتاعا ۇقىپتى قاراۋعا، تازالىقتى ساقتاۋعا جانە وزدەرى تۇراتىن اۋداننىڭ كوركەيۋىنە ۇلەس قوسۋعا شاقىردى.
ەكولوگيالىق اكتسيا بيىل «قالا سەنەن باستالادى» ۇرانىمەن ءوتىپ جاتقان فەستيۆالدىڭ نەگىزگى يدەياسىن ايقىن كورسەتتى. ويتكەنى تۋعان قالاعا دەگەن سۇيىسپەنشىلىك ەڭ الدىمەن كۇندەلىكتى قاراپايىم ارەكەتتەردەن - ءوز اۋلاسىن، كوشەسىن، قوعامدىق كەڭىستىكتەردى تازا ۇستاۋدان جانە قورشاعان ورتاعا جاۋاپكەرشىلىكپەن قاراۋدان باستالادى.
ءىس-شارا قازاقستان رەسپۋبليكاسى پرەزيدەنتىنىڭ «تازا قازاقستان» جالپىۇلتتىق باستاماسىن قولداۋ ماقساتىندا ۇيىمداستىرىلىپ، جاستار اراسىندا ەكولوگيالىق مادەنيەتتى قالىپتاستىرۋعا، ۆولونتەرلىك قوزعالىستى دامىتۋعا جانە قورشاعان ورتاعا دەگەن جاۋاپكەرشىلىكتى ارتتىرۋعا باعىتتالدى.
اكتسياعا قاتىسۋشىلاردىڭ ءبىرى مۇنداي باستامالاردىڭ جاستاردى ورتاق قۇندىلىقتار توڭىرەگىندە بىرىكتىرەتىنىن اتاپ ءوتتى.
ء«بىز فەستيۆالدى كونتسەرتپەن ەمەس، پايدالى ىسپەن باستادىق. بۇل - تۋعان قالاعا دەگەن سۇيىسپەنشىلىكتىڭ ناقتى ارەكەت ارقىلى كورىنەتىنىنىڭ بەلگىسى. ءار ادام ءوز اۋلاسىنا، كوشەسىنە جاناشىرلىق تانىتسا، الماتى بۇرىنعىدان دا تازا ءارى جايلى قالاعا اينالادى. ازاماتتىق جاۋاپكەرشىلىك ءدال وسىنداي قاراپايىم قادامداردان باستالادى»، - دەدى ەكو-بەلسەندى، بلوگەر دۋلات نابيەۆ.
جالپى EcoDay ەكولوگيالىق اكتسياسى اياسىندا 600-دەن استام ادام قامتىلدى. بۇل شارا 12 تامىزعا دەيىن جالعاساتىن ALMA LOVE 2026 جاستار فەستيۆالىنىڭ العاشقى ءىس-شاراسى بولدى. الداعى كۇندەرى فەستيۆال اياسىندا ءبىلىم بەرۋ، مادەنيەت، سپورت، شىعارماشىلىق، ۆولونتەرلىك جانە قوعامدىق باستامالاردى قامتيتىن ونداعان ءىس-شارا وتەدى.
ايتا كەتەيىك، اتالعان فەستيۆال الماتى قالاسى جاستار ساياساتى باسقارماسىنىڭ قولداۋمىن ۇيىمداستىرىلۋدا.
