وڭتۇستىك كورەيا بۇقارالىق اقپارات قۇرالدارى قازاقستاندا جۇرگىزىلگەن ارنايى وپەراتسياعا قاتىستى جاڭا مالىمەتتەردى جاريالادى، دەپ حابارلايدى "ادىرنا" ءتىلشىسى.
ۇقك تەلەكوممۋنيكاتسيالىق الاياقتىققا قاتىسى بار دەگەن كۇدىكپەن 14 وڭتۇستىك كورەيا ازاماتىنىڭ ۇستالعانىن حابارلاعان.
ۇقك مالىمەتىنشە، شەتەلدىكتەر ۇيىمداسقان قىلمىستىق توپ قۇرامىندا تەلەكوممۋنيكاتسيالىق جۇيەلەر ارقىلى الاياقتىق جاساعان دەگەن كۇدىككە ىلىنگەن. ولار 23 شىلدەدە ۇستالىپ، بۇل تۋرالى رەسمي اقپارات 30 شىلدەدە جاريالاندى.
ءتىنتۋ بارىسىندا كۇدىكتىلەر تۇرعان جەردەن كومپيۋتەرلەر، نوۋتبۋكتەر، ۇيالى تەلەفوندار جانە زاڭسىز ارەكەتتەردە پايدالانىلعان باسقا دا تەحنيكالار تاركىلەنگەن. قازىر ولار ۋاقىتشا ۇستاۋ يزولياتورىندا وتىر. پروتسەسسۋالدىق شارالار اياقتالعاننان كەيىن كۇدىكتىلەر ەلدەن شىعارىلادى.
وڭتۇستىك كورەيانىڭ باق مالىمەتىنشە، كۇدىكتىلەر قازاقستان اۋماعىندا كولل-ورتالىق ۇيىمداستىرىپ، وزدەرىن ەلدىڭ قارجىلىق قاداعالاۋ قىزمەتىنىڭ (FSS) قىزمەتكەرلەرى رەتىندە تانىستىرىپ، وڭتۇستىك كورەيا ازاماتتارىنا قوڭىراۋ شالعان.
تەرگەۋ دەرەكتەرىنە سايكەس، ولاردىڭ ارەكەتىنەن 16 ادام زارداپ شەككەن. كۇدىكتىلەر جابىرلەنۋشىلەردەن جالپى 600 ميلليون ۆوننان استام (شامامەن 435–450 مىڭ اقش دوللارى) قاراجاتتى زاڭسىز يەمدەنگەن.
Yonhap News اگەنتتىگىنىڭ حابارلاۋىنشا، كۇدىكتىلەردى قازاقستاننان وڭتۇستىك كورەياعا دەپورتاتسيالاۋ جانە ەكستراديتسيالاۋ 27 شىلدە مەن 5 تامىز ارالىعىندا كەزەڭ-كەزەڭىمەن جۇرگىزىلەدى. ينچحون حالىقارالىق اۋەجايىنا جەتكىزىلگەننەن كەيىن ولاردىڭ بارلىعى قاماۋعا الىنىپ، تەرگەۋ، ايىپ تاعۋ جانە سوت راسىمدەرىنەن وتەدى.
