بلوگەرلەر سوتى. ەربولات ءجانابىلوۆ ۇتىس ويىنىنان قانشا پايدا تاپقانى ەسەپتەلدى

استانادا بلوگەر ەربولات ءجانابىلوۆ ىسىنە قاتىستى سوت وتىرىسى ءوتتى. سۋديا ماليكا نوعايبەكوۆا ودان ۇتىس ويىنىنا قانشا ادام قاتىسقانىن سۇرادى، دەپ حابارلايدى "ادىرنا" ۇلتتىق پورتالى.

ءجانابىلوۆتىڭ ايتۋىنشا، كونكۋرس 21 تامىزدا باستالعان جانە ءالى دە جالعاسىپ جاتىر. سەبەبى بارلىق كولىك ويناتىلىپ بىتكەن جوق. «شامامەن 5–6 مىڭ قازاقستاندىق قاتىستى. قازىرگە دەيىن سەگىز كولىك ويناتىلدى»، – دەدى ول.

بلوگەرلەر 30 مىڭ تەڭگە تۇراتىن Zhana Business اقىلى كۋرسىنا سىلتەمە جاريالاعان. تەك سول كۋرستى ساتىپ العاندار اراسىنان 10 Hyundai Elantra اۆتوكولىگى ويناتىلاتىنى ايتىلعان.

سونىمەن قاتار 24 iPhone سمارتفونى دا ۇتىسقا تىگىلگەن. سمارتفون ورنىنا اقشا تاڭداعاندارعا بلوگەر 350 مىڭ تەڭگەدەن تولەگەن.

10 اۆتوكولىكتىڭ جالپى قۇنى – 100–150 ملن تەڭگە، 24 iPhone – شامامەن 8,4 ملن تەڭگە. بارلىق سىيلىق قورى – 108,4–158,4 ملن تەڭگەنى قۇرايدى.

بولجام بويىنشا، ءجانابىلوۆتار ۇتىستان 21,6–71,6 ملن تەڭگە پايدا تابۋى مۇمكىن. كەي نۇسقادا ءتىپتى شىعىنعا باتۋى دا ىقتيمال.

ءجانابىلوۆ وتىرىسقا ايەلى مەن ادۆوكاتتارىمەن بىرگە كەلدى. كەيىن ايەلى ەلميرا تولەگەنوۆا زالدان شىعارىلىپ، كۋالىك بەرۋدەن باس تارتتى.

ادۆوكات ولەگ چەرنوۆ پروكۋروردى سوتقا شاقىرۋدى سۇرادى. ءىس 15 قىركۇيەكتە قايتا قارالادى.