پوليتسيا جەلىدە تاراعان ءجاسوسپىرىم مەن پوليتسيا قىزمەتكەرلەرى قاتىسقان وقيعاعا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
اق جايىق مالىمەتىنشە، وقيعا 31 شىلدە كۇنى اتىراۋدا بولعان.
پوليتسياعا قالا اكىمدىگى الدىنداعى الاڭدا بالالارعا ارنالعان ەلەكتر كولىكتەرىن زاڭسىز جالعا بەرۋ قىزمەتىنە قاتىستى تۇرعىنداردان شاعىم تۇسكەن. وقيعا ورنىنا ۋچاسكەلىك پوليتسيا ينسپەكتورلارى مەن قالا اكىمدىگى قىزمەتكەرلەرى بارعان.
تەكسەرۋ بارىسىندا بالالارعا ارنالعان جەتى ەلەكتر كولىگى تاركىلەنىپ، ارنايى تۇراققا قويىلعان. قازىر بۇل جالعا بەرۋ قىزمەتىنىڭ زاڭدىلىعى تەكسەرىلىپ جاتىر.
پوليتسيانىڭ حابارلاۋىنشا، ەلەكتر كولىكتەرىن تيەۋ كەزىندە جاسوسپىرىمدەردىڭ ءبىرى كولىككە وتىرىپ الىپ، پوليتسيا قىزمەتكەرلەرىنىڭ زاڭدى تالابىن ورىنداۋدان باس تارتقان. سونداي-اق ونىڭ ساعات 23:00-دەن كەيىن قوعامدىق ورىندا زاڭدى وكىلىنسىز جۇرگەنى انىقتالعان.
وسىدان كەيىن ءجاسوسپىرىم اتىراۋ قالالىق پوليتسيا باسقارماسىنا جەتكىزىلگەن. ونىڭ زاڭدى وكىلىنە بالا تاربيەسىنە قاتىستى مىندەتتەردى تيىسىنشە ورىنداماعانى جانە كامەلەتكە تولماعان بالانىڭ تۇنگى ۋاقىتتا ەرەسەكتەردىڭ قاراۋىنسىز قوعامدىق ورىندا جۇرۋىنە جول بەرگەنى ءۇشىن اكىمشىلىك حاتتاما تولتىرىلدى.
پوليتسيا دەپارتامەنتى تەكسەرۋ اياقتالعاننان كەيىن قولدانىستاعى زاڭناماعا سايكەس ءتيىستى شەشىم قابىلداناتىنىن حابارلادى
