Keşe partiialar mektepterde, auruhanalarda, zauyttarda jäne arhivterde sailauşylarmen kezdesıp, är salanyŋ özektı mäselelerın talqylady. Köterılgen taqyryptar ärtürlı bolǧanymen, olardyŋ bärın bırıktırgen ortaq özek – eŋbek adamy jäne onyŋ kündelıktı mäselelerı boldy.
Kökşetau – bolaşaq qalalar turaly
«Ädılet» partiiasynyŋ ökılderı Aqmola oblysynyŋ tūrǧyndarymen kezdestı. Partiianyŋ respublikalyq sailaualdy ştaby ūiymdastyrǧan kezdesude kökşetaulyqtar öŋır üşın maŋyzdy bastamalardy ūsyndy. Olardyŋ qatarynda käsıpkerlerge arnalǧan bıryŋǧai sifrlyq platformany ıske qosu, kolledjderge jasandy intellekt tehnologiialaryn engızu, kommunaldyq jelılerdı jaŋǧyrtu jäne jaŋa jūmys oryndaryn qūru bar.
Öŋırlerdegı jūmysyn jalǧastyrǧan «Ädılet» sportşylarmen, jattyqtyruşylarmen, önerkäsıp käsıpornynyŋ ūjymymen, sondai-aq turizm jäne şipajai-kurort salasynyŋ ökılderımen kezdestı. Kezdesulerde sportty, turizmdı, käsıpkerlıktı jäne agroönerkäsıp keşenın damytu, fermerlerdı qoldau men auyl şaruaşylyǧy önımderın tereŋ öŋdeu mäselelerı talqylandy.
Kezdesulerdıŋ bırınde Aqmola oblystyq olimpiadalyq rezervtı daiarlau ortalyǧynyŋ ädıskerı Ekaterina Kruglik balalardyŋ tūrǧylyqty jerıne nemese otbasynyŋ materialdyq jaǧdaiyna qaramastan tegın sport seksiialaryna teŋ qoljetımdılıgın qamtamasyz etu mäselesın köterdı.
Mektep – reformanyŋ bastauy
JSDP eldıŋ bolaşaǧy bılım beru jüiesıne bailanysty dep eseptep, osy taqyrypqa arnalǧan arnaiy konferensiia ötkızdı. Deputattyqqa kandidattar, pedagogter men sarapşylar bılım sapasy, kadr tapşylyǧy, mektep infraqūrylymynyŋ jai-küiı jäne mūǧalımderdı qoldau mäselelerın talqylady.
Talqylau qorytyndysynda qatysuşylar bır pıkırge keldı: mektepte jüielı reformalar jürgızılmeiınşe, bäsekege qabılettı memleket turaly aitu qiyn.
Sol künı bılım beru taqyrybyna qatysty öz ūstanymyn Respublica partiiasy da bıldırdı. Kandidat Nūrgül Tau Qazaqstan halyq partiiasynyŋ PISA nätijesı tömen mektepterge aiyppūl salu turaly bastamasyn synǧa alyp, mūndai täsıl mäselenı şeşudıŋ ornyna kınälını ızdeuge ūqsaitynyn aitty.
Onyŋ pıkırınşe, auyl mektepterı bastapqydan-aq qalalyq mekteptermen teŋ jaǧdaida emes. Sondyqtan olardan bırdei nätije talap etu – orynsyz, al mūǧalımderdı jazalau bılım beru jüiesınıŋ älsızdıgın ǧana körsetedı.
Respublica basqa joldy ūsynady. Partiia mūǧalımderdı jazalaudyŋ ornyna bılım beru ortasyn damytu men pedagogterdı qoldaudy qūptaidy.
Ekologiia – därıgerler közımen
«Baitaq» partiiasy üşın ekologiia mäselesı densaulyq saqtau salasymen tyǧyz bailanysty. Keşe būl ūstanym ıs jüzınde körınıs tapty.
Kandidat Tair Saǧymbaev Aqtaudaǧy №2 qalalyq emhananyŋ ūjymymen kezdestı. Kezdesu barysynda medisina salasynyŋ jai-küiı, öŋırdıŋ ekologiialyq qauıpsızdıgı jäne pasientterdı äleumettık qorǧau mäselelerı talqylandy.
Partiianyŋ paiymynşa, naqty şeşımder keŋse qabyrǧasynda emes, kün saiyn halyqpen jūmys ısteitın mamandardyŋ pıkırıne süiene otyryp qabyldanuy tiıs.
Tarihi jady – saiasi kün tärtıbınde
Qazaqstan halyq partiiasy keşe tarihi jady taqyrybyna erekşe nazar audardy. Partiia ızdestıru jūmystaryn, arhivtık zertteulerdı jäne patriottyq jobalardy qoldau maqsatynda «Memorialdyq aimaq» bırlestıgımen yntymaqtastyq turaly memorandumǧa qol qoidy.
Partiia töraǧasy Nūrsūltan Şoqanovtyŋ aituynşa, onyŋ arǧy atasy ondaǧan jyl boiy habar-oşarsyz ketkender qatarynda sanalyp kelgen. Keiın ızdestıru jasaǧy onyŋ jerlengen ornyn anyqtaǧan.
QHP būl bastamany ata-baba erlıgıne taǧzym etudıŋ jäne tarihi şyndyqty saqtaudyŋ maŋyzdy bölıgı dep esepteidı.
Kenşıler ölkesındegı kezdesuler
Keşe Qostanai oblysyna töraǧasy Qairat Aituǧanov bastaǧan «Auyl» partiiasy bardy. Ol eŋbek ūjymdarymen, partiia belsendılerımen jäne auyl tūrǧyndarymen kezdesıp, agroönerkäsıp keşenın damytu, käsıpkerlıktı qoldau jäne infraqūrylymdy jaŋartu mäselelerın talqylady.
Sapar barysynda Aituǧanov özınıŋ eŋbek joly bastalǧan «Qazpoşta» ūjymymen de kezdestı. Sapar jastar volonterlerımen bırge ötken ügıt-nasihat aksiiasymen aiaqtaldy.
Al däl osy uaqytta Qaraǧandyǧa «Aq jol» partiiasynyŋ töraiymy Däniia Espaeva bardy. «Seven Refractories Asia» JŞS ūjymymen kezdesude otandyq öndıruşılerdı qoldau, jaŋa jūmys oryndaryn aşu, salyq saiasaty jäne önerkäsıptı damytu mäselelerı söz boldy.
Soŋǧy künderı bırneşe partiianyŋ Jezqazǧan men Qaraǧandy oblysyn kezdesu alaŋy retınde taŋdauy kezdeisoq emes. Būl öŋırler ūzaq jyldar boiy el ekonomikasynyŋ damuyna üles qosyp kele jatqan eŋbek adamdarynyŋ simvolyna ainalǧan. Baǧdarlamalary ärtürlı bolǧanymen, eŋbekke qūrmet taqyryby köptegen partiialardy ortaq ūstanym töŋıregıne toptastyryp otyr.
Jezqazǧandaǧy pıkırtalas
Respublica partiiasy Jezqazǧanda öz jaqtastarynyŋ forumyn ötkızıp, onda öŋırdıŋ önerkäsıbı, joldarynyŋ jaǧdaiy, medisinasy jäne bılım beru salasy talqylandy.
Alaida köpşılıktıŋ nazaryn baǧdarlamalyq ūsynystardan görı Meiır Alpysovtyŋ «Aq jol» partiiasynyŋ synyna bergen jauaby audardy.
Ol memleket azamattaryn «ūry nemese jemqor» retınde qabyldamauǧa şaqyryp, şetelde tabys tauyp jürgen qazaqstandyqtardyŋ qarajatyn el ekonomikasyna investisiialauǧa jaǧdai jasau qajet ekenın aitty. Onyŋ pıkırınşe, olardy äleuettı zaŋ būzuşy retınde qarastyru dūrys emes.
Osylaişa, bır künnıŋ ışınde sailaualdy nauqanda ekı negızgı pıkırtalas aiqyndaldy. Onyŋ bırı – mektepterge aiyppūl salu mäselesıne, ekınşısı – şetelde biznes jürgızetın qazaqstandyqtarǧa degen senımge qatysty boldy. Būl sailau jaqyndaǧan saiyn partiialardyŋ özara aşyq pıkırtalasqa jiı tüsıp jatqanyn jäne olardyŋ baǧdarlamalary arasyndaǧy naqty aiyrmaşylyqtardyŋ barǧan saiyn aiqyndala tüskenın körsetedı.
