قاراعاندىدا ەڭبەك دەمالىسىندا جۇرگەن پوليتسيا قىزمەتكەرى كوپقاباتتى تۇرعىن ۇيدەگى ءورت كەزىندە بەس بالانى قۇتقارىپ، اۋىر زارداپتىڭ الدىن الدى، دەپ حابارلايدى "ادىرنا".
وقيعا بۇگىن قالاداعى تۇرعىن ۇيلەردىڭ بىرىندە بولعان. ۇيىنە قايتىپ كەلە جاتقان قاراعاندى قالالىق پوليتسيا باسقارماسى پاترۋلدىك پوليتسيا پولكىنىڭ اعا ينسپەكتورى دىنمۇحامەت سۇلتان سەگىزىنشى قاباتتاعى پاتەردىڭ تەرەزەسىنەن قويۋ ءتۇتىن شىعىپ جاتقانىن بايقايدى. جاعدايدىڭ قاۋىپتى ەكەنىن بىردەن تۇسىنگەن ول ەش كىدىرمەستەن وقيعا ورنىنا بەت العان.
تۇتىنگە تولى پاتەرگە كىرگەن ءتارتىپ ساقشىسى ىشىندە قالعان بەس بالانى تاۋىپ، ولاردى قىسقا ۋاقىت ىشىندە قاۋىپسىز جەرگە شىعارىپ ۇلگەرگەن. بالالاردىڭ امان ەكەنىنە كوز جەتكىزگەننەن كەيىن ول قايتادان ءورت شىققان پاتەرگە ورالعان.
پوليتسەي الدىمەن ەلەكتر جەلىسىن اجىراتىپ، قىسقا تۇيىقتالۋ سالدارىنان ءورتتىڭ ۇلعايۋىنا جول بەرمەگەن. كەيىن وقيعا ورنىندا بولعان ەكى تۇرعىنمەن بىرگە ءورت سوندىرۋشىلەر كەلگەنگە دەيىن اسۇيدەگى جالىندى اۋىزدىقتاۋعا كىرىسكەن.
دىنمۇحامەت سۇلتاننىڭ جەدەل ءارى باتىل ارەكەتىنىڭ ارقاسىندا ادام شىعىنى بولۋى مۇمكىن قايعىلى وقيعانىڭ جانە ءورتتىڭ كەڭىنەن تارالۋىنىڭ الدىن الۋ مۇمكىن بولدى.
ءىىم ءباسپاسوز قىزمەتىنىڭ مالىمەتىنشە، پوليتسەي بۇل ەرلىكتى قىزمەتتىك مىندەتىن اتقارىپ جۇرگەن كەزدە ەمەس، ەڭبەك دەمالىسىندا جۇرگەن ساتىندە جاساعان. سوعان قاراماستان ول كاسىبي شەبەرلىگى مەن ازاماتتىق جاۋاپكەرشىلىگىن جوعارى دەڭگەيدە تانىتىپ، ناعىز پوليتسيا قىزمەتكەرىنە ءتان جانقيارلىقتىڭ ۇلگىسىن كورسەتتى.
قۇتقارىلعان وتباسىنىڭ كورشىسى قۇقىق قورعاۋ ورگانىنا حابارلاسىپ، بالالاردىڭ ءومىرىن ساقتاپ قالعان پوليتسەيگە شىنايى العىسىن جەتكىزگەن.
