شىعىس قازاقستان وبلىسىنىڭ اكىمى نۇرىمبەت ساقتاعانوۆ گلۋبوكوە اۋدانى سولنەچنىي كەنتىندە ورنالاسقان ارنايى الەۋمەتتىك قىزمەت كورسەتۋ ورتالىعىنا بارىپ، جاڭاجىلدىق كەشتى جالعىزباستى قارتتارمەن بىرگە وتكىزدى، دەپ حابارلايدى “ادىرنا”.
قازىر مۇندا 116 ادام تۇرادى. ولارعا بارلىق قولايلى جاعداي جاسالعان. 25 جىل بويى جۇمىس ىستەپ تۇرعان ورتالىقتىڭ ەڭ قارت تۇرعىنى 96 جاستا.
ايماق باسشىسى قازىنالى قارتتاردى جاڭا جىل مەرەكەسىمەن شىن جۇرەكتەن قۇتتىقتاپ، ىزگى تىلەگىن ارنادى.
«بۇگىن سىزدەردىڭ قال-جاعدايلارىڭىزدى ءبىلىپ، اڭگىمەلەسۋ ءۇشىن ارنايى كەلدىم. دەندەرىڭىز ساۋ، عۇمىر جاستارىڭىز ۇزاق بولسىن. مەملەكەت سىزدەرگە بارلىق ءتيىستى جاعدايدى جاساي بەرەدى»، - دەدى نۇرىمبەت ساقتاعانوۆ.
سونداي-اق قارتتارعا باعالى سىيلىقتار تابىستالدى. كەزدەسۋ بارىسىندا ورتالىققا جاڭا، كوپ ادام سىياتىن شاعىن اۆتوبۋس قاجەت ەكەنى ايتىلدى. وبلىس اكىمى بۇل ماسەلەنىڭ مىندەتتى تۇردە شەشىلەتىنىن جەتكىزدى.
ءسوز سوڭىندا قارتتار ايماق باسشىسىنا شىنايى ريزاشىلىقتارىن ءبىلدىرىپ، باتالارىن بەردى.
