قىرعىزستان پرەزيدەنتى سادىر جاپاروۆ «قىرعىز رەسپۋبليكاسى پرەزيدەنتىن جانە قىرعىز رەسپۋبليكاسى جوگوركۋ كەڭەشىنىڭ دەپۋتاتتارىن سايلاۋ تۋرالى» كونستيتۋتسيالىق زاڭعا وزگەرىستەر ەنگىزۋ جونىندەگى كونستيتۋتسيالىق زاڭعا قول قويدى، دەپ حابارلايدى «ادىرنا» ءتىلشىسى.
قۇجاتقا سايكەس، كەزەكتى پرەزيدەنت سايلاۋى مەملەكەت باسشىسىنىڭ وكىلەتتىك مەرزىمى اياقتالاتىن جىلدىڭ قاڭتار ايىنىڭ ءتورتىنشى سارسەنبىسىندە وتەدى. وسىلايشا قىرعىزستانداعى كەلەسى پرەزيدەنت سايلاۋى 2027 جىلدىڭ 27 قاڭتارىنا بەلگىلەندى.
سونىمەن قاتار جوگوركۋ كەڭەش دەپۋتاتتارىنىڭ كەزەكتى سايلاۋى دا پارلامەنتتىڭ قولدانىستاعى شاقىرىلىمىنىڭ كونستيتۋتسيالىق وكىلەتتىك مەرزىمى اياقتالاتىن ايدىڭ سوڭعى سارسەنبىسىندە وتكىزىلەتىن بولادى.
حابارلامادا داۋىس بەرۋ كۇنىن جۇمىس كۇنىنە اۋىستىرۋ سايلاۋشىلاردىڭ بەلسەندىلىگىن ارتتىرۋ ماقساتىندا جاسالعانى ايتىلعان. سايلاۋ وتەتىن كۇن رەسمي تۇردە جۇمىس ىستەمەيتىن كۇن بولىپ جاريالانادى.
