فوتو:aviasales
الماتى ورتالىق ازياداعى باستى گاسترونوميالىق باعىتقا اينالىپ كەلەدى. قالا تانىمال Eater باسىلىمىنىڭ «Where to Eat 2026» گاسترونوميالىق باعىتتار تىزىمىنە ەندى.
ءتىزىمدى جاساۋشىلار سوڭعى بىرنەشە جىلدا الماتى وڭىردەگى باس اسپازداردىڭ باسىن قوسقان العاشقى Almaty Food Fest فەستيۆالىن وتكىزىپ، ءوزىنىڭ العاشقى گاسترونوميالىق گيدىن جارىققا شىعارعانىن ەرەكشە اتاپ ءوتتى.
باسىلىمنىڭ باعالاۋىنشا، كەسپەسى مول بەسبارماق، كلاسسيكالىق قازى، ەت قوسىلعان سامسا، قۋىرىلعان باۋىرساق پەن قۋىرىلعان لاعمان ارقىلى ساياحاتشىلار جەرگىلىكتى كوشپەلى داستۇرلەردىڭ مۇراسىن، سونداي-اق ۇيعىر، ورىس، وزبەك، كورەي، تۇرىك جانە ءۇندى اسحانالارىنىڭ ىقپالىن سەزىنە الادى. ءداستۇرلى دامدەر كوك بازاردا ءالى دە كەڭىنەن تاراعان، ال نەو-كوشپەلى باعىتتاعى زاماناۋي مەيرامحانالار ولاردى زاماناۋي ۇلگىدە ۇسىنادى.
«بيىل تاماقتانۋعا ارنالعان ەڭ ۇزدىك ساياحات باعىتتارىن تاڭداعاندا، ءبىز تەك ۇزدىك مەيرامحانالاردى عانا ەمەس، سونىمەن قاتار ولاردى شىن جۇرەكتەن ۇسىناتىن ادامداردى دا ىزدەدىك. اۆتورلارىمىز بۇل تىزىمگە وزدەرى جاقسى بىلەتىن (كوبى بۇل جەرلەردى ءۇيىم دەپ ساناعان) ورىنداردى ەنگىزدى، ال باس اسپازدار مەن رەستوراتورلار وزدەرىنە دەم بەرەتىن الەمنىڭ تۇكپىر-تۇكپىرىندەگى ءدامدى اس ازىرلەيتىن ورىنداردى ۇسىندى. قازاقتىڭ نەو-كوشپەلى توي داستارحانى بيىل الدا كەرەمەت ءدامدى ساپار كۇتىپ تۇرعانىنا ەش كۇمان قالدىرمايدى»، – دەپ جازادى باسىلىم.
ايتا كەتەيىك، Eater – مەيرامحانالار مەن گاسترونوميا تۋرالى الەمدەگى ەڭ ىقپالدى باسىلىمداردىڭ ءبىرى. ونىڭ تىزىمىنە ەنۋ قالانىڭ حالىقارالىق تانىمالدىلىعىن ارتتىرىپ، گاسترونوميالىق ءتۋريزمنىڭ دامۋىنا وڭ ىقپال ەتەدى.
