2026 جىلدىڭ 16 ساۋىرىندە شىمكەنت قالاسىندا «اق جول» دەموكراتيالىق پارتياسى قر قارجى مينيسترلىگىنىڭ مەملەكەتتىك كىرىستەر كوميتەتىمەن بىرلەسىپ ۇيىمداستىرعان، جاڭا سالىق كودەكسىن قولدانۋدىڭ وزەكتى ماسەلەلەرى مەن ونىڭ كاسىپكەرلىك ورتاعا اسەرىن تالقىلاۋعا ارنالعان جيىن ءوتتى.
تالقىلاۋعا بيزنەس وكىلدەرى، سالالىق ساراپشىلار، ءماجىلىس جانە بارلىق دەڭگەيدەگى ءماسليحات دەپۋتاتتارى، سونداي-اق مەملەكەتتىك كىرىستەر كوميتەتىنىڭ باسشىلىعى قاتىستى.
ازات پەرۋاشەۆ اتاپ وتكەندەي، «اق جول» دەموكراتيالىق پارتياسى قولدانىستاعى سالىق كودەكسىنىڭ وسى رەداكتسياسىن قابىلداۋعا باسىنان قارسى بولىپ، ماجىلىستەگى ءبىرىنشى جانە ەكىنشى وقىلىمداردىڭ بارلىعىندا وعان قارسى داۋىس بەرگەن. پارتيا كاسىپكەرلىك ورتا ءۇشىن ەلەۋلى كەمشىلىكتەر مەن تاۋەكەلدەردىڭ بار ەكەنىن اتاپ كورسەتكەنىمەن، «اق جول» ۇسىنعان جۇزدەن استام تۇزەتۋدى قوسا العاندا، كوپتەگەن ۇسىنىستار ەسكەرىلمەدى.
الايدا بيزنەس پەن پارتيا ۇستانىمىن اقىرىندا مەملەكەت باسشىسى قولدادى: قازاقستان رەسپۋبليكاسىنىڭ پرەزيدەنتى ۇكىمەتكە سالىق كودەكسىنىڭ نورمالارىن قايتا قاراپ، قاجەت بولعان جاعدايدا وزگەرىستەر ەنگىزۋدى تاپسىردى. وسىعان بايلانىستى «اق جول» انىقتالعان تۇيتكىلدى ماسەلەلەردى ەسكەرە وتىرىپ بۇرىن قابىلدانباعان ۇسىنىستارىن قايتا ەنگىزبەك.
«اق جول» دەمپارتياسى توراعاسىنىڭ سالىق بويىنشا كەڭەسشىسى انتونينا ان سالىق ساياساتىن قالىپتاستىرۋ كەزىندە بيزنەستىڭ ءارتۇرلى سالالارىنىڭ ەرەكشەلىكتەرىن ەسكەرۋ قاجەتتىگىن ايتىپ، اسىرەسە بولشەك ساۋدا ءۇشىن مولشەرلەمەلەردى كوتەرۋدىڭ سەزىمتال ماسەلە ەكەنىن جەتكىزدى. ول اشىق ءارى بولجامدى اكىمشىلەندىرۋدىڭ، ەنگىزىلگەن تسيفرلىق باقىلاۋدىڭ، ادال سالىق تولەۋشىلەردى قورعاۋدىڭ ماڭىزىن اتاپ ءوتىپ، جاۋاپكەرشىلىكتى ساتىپ الۋشىلارعا جۇكتەۋگە بولمايتىنىن، سونداي-اق ءتيىمدى شاعىمدانۋ تەتىكتەرى مەن مەملەكەت پەن بيزنەس مۇددەلەرىنىڭ تەڭگەرىمى بولۋى قاجەت ەكەنىن ايتتى.
مەملەكەتتىك كىرىستەر كوميتەتى توراعاسىنىڭ ورىنباسارى جانىبەك نۇرجانوۆ ۋاكىلەتتى ورگاننىڭ ۇستانىمىن جەتكىزىپ، «كولەڭكەلى» اينالىم، جالعان جەتكىزۋ تىزبەكتەرى مەن فورمالدى قۇجات اينالىمى ماسەلەلەرىن اتادى.
نەگىزگى باياندامالاردان كەيىن اشىق سۇراق-جاۋاپ سەسسياسى ءوتتى. وندا ەلىمىزدىڭ ءار وڭىرىنەن كەلگەن بيزنەس قاۋىمداستىق وكىلدەرى كوميتەت توراعاسىنىڭ ورىنباسارىنا تاجىريبەلىك سيپاتتاعى كوپتەگەن سۇراقتارىن قويدى.
اتىراۋ، قىزىلوردا وبلىستارى، الماتى قالاسى مەن تۇركىستان وبلىسى وكىلدەرىنىڭ قاتىسۋىمەن قىزۋ پىكىرتالاس ءوتىپ، وندا ققس قولدانۋ، شەگەرىمدەردى ەسەپكە الۋ، حالىقارالىق تاسىمالدار، سالىق رەجيمدەرى، ققس شەكتەرى، ءسان-سالتانات سالىعى، اكتيۆتەردى قايتا باعالاۋ، قىزمەت تۇرلەرىنىڭ كلاسسيفيكاتسياسى جانە ەسەپتىلىكتى اكىمشىلەندىرۋ ماسەلەلەرى كوتەرىلدى.
تالقىلاۋ قورىتىندىسى بويىنشا «اق جول» دەموكراتيالىق پارتياسى قازىرگى مەملەكەت پەن بيزنەس مۇددەلەرىنىڭ تەپە-تەڭدىگى قاعيداتىن ەسكەرە وتىرىپ، سالىقتىق رەتتەۋ ۇلگىسى ءارى قارايعى جۇيەلى تۇردە جەتىلدىرۋدى قاجەت ەتەتىنىن اتاپ ءوتتى. كەزدەسۋ كاسىپكەرلەر قاۋىمداستىعىنىڭ قۇقىقتىق بەلگىسىزدىك پەن ادال نارىق قاتىسۋشىلارىنا ارتىق قىسىم جاسامايتىن، تۇسىنىكتى، اشىق ءارى بولجامدى ەرەجەلەردى تالاپ ەتەتىندىگىن راستادى.
«اق جول» دەمپارتياسى كاسىپكەرلەر مۇددەسىن قورعاۋ جانە ەلدەگى ىسكەرلىك بەلسەندىلىكتى قولداۋ مەن تۇراقتى ەكونوميكالىق دامۋعا نەگىزدەلگەن سالىق ساياساتىن جەتىلدىرۋ بويىنشا جۇمىستارىن جالعاستىرا بەرەدى.
