قازاقستان شىلدە ايىنىڭ باسىنان بەرى رەسەيگە شامامەن 5 مىڭ توننا بەنزين ەكسپورتتاعان. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
دەرەككوزدەردىڭ مالىمەتىنشە، رەسەيدە بەنزين ءوندىرىسى قاتارىنان ءۇشىنشى اي سۇرانىس دەڭگەيىنەن تومەن قالىپ وتىر. شىلدە ايىندا بۇل ايىرماشىلىق 700–800 مىڭ تونناعا جەتكەن.
رەسەي پرەمەر-ءمينيسترىنىڭ ورىنباسارى الەكساندر نوۆاك سەيسەنبى كۇنى كوپتەگەن وڭىردە شەكتەۋلەردىڭ الىنىپ جاتقانىن، الايدا كەيبىر ايماقتاردا جاعداي ءالى دە كۇردەلى ەكەنىن جەتكىزدى. ونىڭ سوزىنشە، رەسەي تاپشىلىقتى ەڭسەرۋ ماقساتىندا قازاقستاننان بولەك بەلارۋس پەن ءۇندىستاننان دا بەنزين يمپورتتاپ جاتىر.
دەرەككوزدەردىڭ ءبىرىنىڭ ايتۋىنشا، قازاقستاندىق «كوندەنسات» مۇناي وڭدەۋ زاۋىتى شىلدە ايىندا ەدىل بويى ءوڭىرى مەن ماسكەۋ وبلىسىنا 5 مىڭ توننا اۆتوكولىك بەنزينىن جونەلتكەن. ونىڭ ىشىندە شامامەن 1 مىڭ تونناسى وسى ايدىڭ العاشقى ونكۇندىگىندە جەتكىزىلگەن.
ال شىلدەدە 17,5 مىڭ توننا كولەمىندە ەكسپورتتىق كۆوتا العان پاۆلودار مۇناي-حيميا زاۋىتى ازىرگە رەسەيگە ءونىم جونەلتپەگەن. بۇل تۋرالى سالاداعى ءۇش دەرەككوز مالىمدەدى.
شىلدە ايىنا دەيىن «كوندەنسات» قازاقستانداعى سوڭعى ءبىر جىل ىشىندە ەنەرگەتيكا مينيسترلىگىنەن بەنزيندى ەركىن ساتۋعا جانە ەكسپورتتاۋعا اي سايىن كۆوتا الىپ وتىرعان جالعىز زاۋىت بولدى. ول ونىمدەرىن ورتالىق ازيا ەلدەرىنە، گرۋزياعا جانە اۋعانستانعا ەكسپورتتاپ كەلگەن. وسى ايدا زاۋىتتىڭ اي-92 بەنزينىنە ارنالعان ەكسپورتتىق كۆوتاسى 24 156 توننانى، ال اي-95 بەنزينىنە ارنالعان كۆوتاسى 4 مىڭ توننانى قۇراپ وتىر.
