قازاقستان پرەزيدەنتى قاسىم-جومارت توقاەۆ برازيليا پرەزيدەنتى لۋيس يناسيۋ لۋلا دا سيلۆانى تاۋەلسىزدىك كۇنىمەن قۇتتىقتادى، دەپ حابارلايدى “ادىرنا” ۇلتتىق پورتالى اقوردانىڭ ءباسپاسوز قىزمەتىنە سىلتەپ.
“قاسىم-جومارت توقاەۆ برازيليا فەدەراتيۆتىك رەسپۋبليكاسىنىڭ تاۋەلسىزدىك كۇنىنە وراي لۋيس يناسيۋ لۋلا دا سيلۆاعا قۇتتىقتاۋ جەدەلحاتىن جولدادى” دەلىنگەن حابارلامادا.
پرەزيدەنت ۇلت بىرلىگى مەن ىنتىماعىنىڭ بىرەگەي نىشانى بولعان بۇل مەيرامنىڭ ەل تاريحىنداعى ورنى ەرەكشە ەكەنىن اتاپ ءوتىپ، برازيليا حالقىنىڭ ءوسىپ-وركەندەي بەرۋىنە تىلەكتەستىك ءبىلدىردى.
سونداي-اق مەملەكەت باسشىسى بىرلەسكەن كۇش-جىگەردىڭ ارقاسىندا ەكى ەل اراسىنداعى قارىم-قاتىناس ءداستۇرلى دوستىق پەن ءوزارا قولداۋ رۋحىندا ودان ءارى نىعايا تۇسەتىنىنە سەنىمدى ەكەنىن جەتكىزدى.
