Astananyŋ mamandandyrylǧan audanaralyq äkımşılık qūqyq būzuşylyqtar jönındegı soty Ūlttyq bank töraǧasynyŋ orynbasary Äliia Moldabekovaǧa äkımşılık aiyppūl saldy, dep habarlaidy "Adyrna" tılşısı Orda-ǧa sıltep.
Is Joǧary auditorlyq palatanyŋ Ūlttyq banktıŋ aktivterdı paidalanuyna jäne zeinetaqy aktivterın basqaruyna jürgızgen auditınen keiın qaraldy. Tekseru qorytyndysy boiynşa 2025 jyly jeltoqsanda Ūlttyq bankke 35 tarmaqtan tūratyn nūsqama berılgen. Onyŋ ekı tarmaǧy belgılengen merzımde oryndalmaǧan. Bırınşı talap investisiialyq portfeldı basqaruǧa qatysy joq qyzmetkerlerge tölengen syiaqylardy qaitaruǧa qatysty bolǧan. Ūlttyq bank būl qarajatty 2026 jyldyŋ 1 säuırıne deiın qaitaruy tiıs edı. Alaida retteuşı Azamattyq kodeks normalaryna süiene otyryp, tölemderdıŋ jūmys beruşınıŋ aktılerı negızınde jürgızılgenın jäne olardy negızsız baiu retınde qaitaru mümkın emestıgın habarlaǧan.
Ekınşı talapqa säikes, Ūlttyq bank 2026 jylǧy 20 nauryzǧa deiın «Qazaqstan Ūlttyq Bankınıŋ Ūlttyq investisiialyq korporasiiasy» AQ üşın komissiialyq syiaqyny esepteudıŋ bıryŋǧai täsılın äzırleuı qajet bolǧan. Alaida merzımdı 31 tamyzǧa deiın ūzartu turaly ötınış tek 13 mamyrda joldanǧan.
Sot otyrysynda Äliia Moldabekova öz kınäsın moiyndamai, qūqyq būzuşylyqtyŋ eleusız ekenın alǧa tartyp, ıstı toqtatudy sūrady. Al Joǧary auditorlyq palatanyŋ ökılı Ūlttyq bank talaptardy uaqytynda oryndamaǧanyn jäne keibır jauaptardyŋ äkımşılık hattama jasalǧannan keiın ǧana joldanǧanyn aitty. Sot Ūlttyq bank töraǧasy orynbasaryn Äkımşılık qūqyq būzuşylyq turaly kodekstıŋ 462-babynyŋ 3-bölıgı («Memlekettık baqylau jäne qadaǧalau organdarynyŋ zaŋdy talaptaryn nemese nūsqamalaryn oryndamau nemese tiısınşe oryndamau») boiynşa kınälı dep tanyp, 15 ailyq eseptık körsetkış mölşerınde, iaǧni 64 875 teŋge kölemınde aiyppūl saldy.
Sot qaulysy äzırge zaŋdy küşıne engen joq.
