«تاليبان» قوزعالىسىنىڭ وكىلى زابيحۋللا مۋجاحيد اۋعانستان بيلىگى باتىستىق قۇندىلىقتاردىڭ ىقپالىندا دەپ ەسەپتەيتىن حالىقارالىق ۇيىمداردىڭ «نۇسقاۋلارىن» قابىلدامايتىنىن ايتتى، دەپ حابارلايدى "ادىرنا" ءتىلشىسى.
ول بۇل تۋرالى ەلدىڭ «ميلي» ۇلتتىق تەلەارناسىنا بەرگەن سۇحباتىندا حابارلاعان. ءمۋجاحيدتىڭ سوزىنشە، اۋعانستاندا ايەلدەردىڭ قۇقىقتارى شاريعات تالاپتارىنا سايكەس قامتاماسىز ەتىلگەن. ونىڭ ايتۋىنشا، «تاليبان» وكىلدەرى باتىستىق كوزقاراسقا نەگىزدەلگەن جانە يسلام قۇقىعىنا قايشى كەلەدى دەپ سانايتىن ايەلدەر قۇقىقتارىن قابىلدامايدى.
سونداي-اق قوزعالىس وكىلى «تاليبان» مۇشەلەرى ءدىني عالىمدار ەكەنىن جانە ايەلدەردىڭ قۇقىقتارىنا قاتىستى يسلام نورمالارىن تۇسىندىرۋگە جەتكىلىكتى ءبىلىمى بار دەپ ەسەپتەيتىنىن ايتتى.
بۇل مالىمدەمە 11–12 شىلدە كۇندەرى يسلامابادتا وتكەن يسلام ىنتىماقتاستىعى ۇيىمىنىڭ ايەلدەر ىستەرى جونىندەگى مينيسترلەرىنىڭ 9-كونفەرەنتسياسىنىڭ قورىتىندى دەكلاراتسياسى جاريالانعاننان كەيىن جاسالدى.
قۇجاتتا اۋعانستانداعى قىزداردىڭ ءبىلىم الۋىنا جانە ايەلدەردىڭ ەڭبەك ەتۋىنە قويىلعان شەكتەۋلەر يسلام قۇندىلىقتارىنا قايشى كەلەتىنى اتاپ وتىلگەن.
كونفەرەنتسياعا قاتىسۋشىلار يسلام ايەلدەر مەن قىزداردىڭ قادىر-قاسيەتىن، قۇقىقتارىن، قوعام ومىرىنە قاتىسۋىن جانە دامۋىن قولدايتىنىن ايتىپ، ولاردىڭ الەۋمەتتىك، ەكونوميكالىق جانە ساياسي ومىرگە تولىققاندى ارالاسۋىنىڭ ماڭىزىن ەرەكشە اتاپ ءوتتى. سونىمەن قاتار دەكلاراتسيادا اۋعانستاندا ايەلدەرگە قاتىستى ەنگىزىلگەن شەكتەۋلەرگە بايلانىستى الاڭداۋشىلىق ءبىلدىرىلىپ، مۇنداي شارالار ايەلدەردىڭ قۇقىقتارى مەن ار-نامىسىن قورعايتىن يسلام قاعيداتتارىنا قايشى كەلەتىنى كورسەتىلگەن.
