2026 جىلعى 25 شىلدەدە جەتىسۋ وبلىسى الاكول اۋدانىنىڭ اقشي اۋىلىندا جازعى ماۋسىمنىڭ ەڭ اۋقىمدى مادەني-ويىن-ساۋىق شارالارىنىڭ ءبىرى – «الاكول تولقىنى» فەستيۆالى وتەدى.
فەستيۆالدىڭ ماقساتى – جەتىسۋ ءوڭىرىنىڭ تۋريستىك الەۋەتىن تانىتۋ، الاكول كولىنىڭ تابيعي سۇلۋلىعىن ناسيحاتتاۋ، ىشكى ءتۋريزمدى دامىتۋ جانە تۇرعىندار مەن قوناقتارعا ساپالى دەمالىس مادەنيەتىن ۇسىنۋ.
كوگىلدىر كول جاعاسىندا ۇيىمداستىرىلاتىن مەرەكەلىك شارادا مۋزىكا، ونەر جانە زاماناۋي ويىن-ساۋىق باعدارلامالارى توعىسادى. تابيعاتتىڭ اسەم كورىنىسى مەن كوتەرىڭكى اتموسفەرا فەستيۆال قوناقتارىنا ەرەكشە اسەر سىيلاماق.
باعدارلاما اياسىندا تانىمال جۇرگىزۋشىلەردىڭ قاتىسۋىمەن ينتەراكتيۆتى ويىندار مەن فلەشموبتار، ءتۇرلى بايقاۋلار وتەدى. سونداي-اق قازاقستان ەستراداسى جۇلدىزدارىنىڭ قاتىسۋىمەن گالا-كونتسەرت ۇيىمداستىرىلىپ، حودۋليستەر، ءتىرى مۇسىندەر جانە الىپ روستوۆوي قۋىرشاقتار كورەرمەندەرگە تەاترلاندىرىلعان قويىلىمدارىن ۇسىنادى.
كەشكى ۋاقىتتا DJ-سەتپەن جالعاساتىن بي كەشى ۇيىمداستىرىلىپ، فەستيۆال اسەرلى مەرەكەلىك وتشاشۋمەن قورىتىندىلانادى.
ۇيىمداستىرۋشىلاردىڭ ايتۋىنشا، «الاكول تولقىنى» فەستيۆالى ءوڭىردىڭ تۋريستىك تارتىمدىلىعىن ارتتىرىپ، الاكول جاعالاۋىن جازعى دەمالىستىڭ باستى باعىتتارىنىڭ ءبىرى رەتىندە كەڭىنەن ناسيحاتتاۋعا مۇمكىندىك بەرەدى.
