قىتاي العاش رەت جوعارى قۋاتتى ميكروتولقىندى قارۋ جۇيەسىن رەسمي تۇردە تانىستىردى. ول تومەن وربيتاداعى اپپاراتتاردى، سونىڭ ىشىندە امەريكالىق Starlink سپۋتنيكتەر جەلىسىن جەدەل ىستەن شىعارۋعا ارنالعان، دەپ حابارلايدى «ادىرنا» ءتىلشىسى South China Morning Post باسىلىمىنا سىلتەمە جاساپ.
ەلدىڭ ۇلتتىق قورعانىس تەحنولوگيالارى ۋنيۆەرسيتەتىنىڭ زەرتتەۋشىلەرى ازىرلەگەن قوندىرعىلاردىڭ قۋاتى 100 گيگاۆاتتقا دەيىن جەتەدى. ەگەر بۇرىنعى پروتوتيپتەردىڭ قۋاتى شامامەن 20 گيگاۆاتت بولسا، جاڭا ءموبيلدى پلاتفورمالار قۋاتى 100 گيگاۆاتتقا دەيىن جەتەتىن ميكروتولقىندى ساۋلەلەردى شىعارا الادى. بۇل كورسەتكىش عارىش اپپاراتتارىنىڭ قورعانىس جۇيەسىن بۇزىپ، ولاردىڭ بورتتىق ەلەكترونيكاسىن بالقىتىپ جىبەرۋگە جەتكىلىكتى ەكەنى ايتىلدى.
اسكەري ساراپشىلاردىڭ ايتۋىنشا، مىڭداعان شاعىن سپۋتنيكتەن تۇراتىن وربيتالىق توپتاردى ءداستۇرلى زىمىراندارعا قارسى قارۋمەن جويۋ ەكونوميكالىق تۇرعىدان ءتيىمسىز. ال ميكروتولقىندى قارۋدى قولدانۋ بۇل ماسەلەنى شەشپەك.
عالىمداردىڭ سوزىنشە، ميكروتولقىندى ساۋلەلەر سپۋتنيكتەردى فيزيكالىق تۇرعىدان قيراتپايدى، تەك ولاردى جارامسىز مەتالل ۇيىندىسىنە اينالدىرادى. بۇل عارىشتا ميلليونداعان قاۋىپتى سىنىقتاردىڭ پايدا بولۋىنا جول بەرمەي، جەر ماڭىنداعى كەڭىستىكتىڭ قوقىسپەن لاستانۋىن ازايتادى.
جاريالانعان ماتەريالدا كەيبىر قوندىرعىلاردىڭ اسكەري قۇرىلىمدارعا بەرىلگەنى، ال جوبانىڭ زەرتحانالىق سىناق كەزەڭىنەن ءوتىپ، تاجىريبەدە قولدانىلاتىن تەحنولوگياعا اينالعانى ايتىلعان. سونىمەن قاتار ينجەنەرلەر −40°C تەمپەراتۋرادا دا جابدىقتى ىسكە قوسۋعا مۇمكىندىك بەرەتىن جاڭا قۋات جۇيەلەرىن تانىستىرعان.
بەيجىڭ بۇل جوبالاردى جەدەل دامىتۋعا تۇرتكى بولعان نەگىزگى سەبەپتەردىڭ ءبىرى رەتىندە يلون ماسكتىڭ SpaceX كومپانياسى جۇزەگە اسىرىپ وتىرعان Starlink باعدارلاماسىن اتادى.
«Starlink مۇمكىندىكتەرى قازىرگى اسكەري قاقتىعىستاردا بەلسەندى تۇردە سىنالىپ جاتىر جانە قىتاي قارۋلى كۇشتەرى ونى ەلدىڭ ۇلتتىق قاۋىپسىزدىگىنە تونەتىن تىكەلەي قاتەر رەتىندە قاراستىرادى»،– دەلىنگەن حابارلامادا.
