Qazaqstandyq oquşylar fizikadan eŋ bedeldı halyqaralyq bılım dodasynda el tarihyndaǧy eŋ üzdık nätijege qol jetkızdı. 2026 jylǧy 4-12 şılde aralyǧynda Kolumbiianyŋ Bukaramanga qalasynda ötken 56-şy Halyqaralyq fizika olimpiadasynda (International Physics Olympiad, IPhO) ūlttyq qūramanyŋ bes müşesı de altyn medal jeŋıp aldy. Būl turaly Oqu-aǧartu ministrlıgı aitty, dep habarlaidy «Adyrna» tılşısı.
Biyl olimpiadaǧa älemnıŋ 85 elınen 381 oquşy qatysqan. Qatysuşylar kürdelı teoriialyq jäne eksperimenttık tapsyrmalardy oryndap, bılımderı men ǧylymi daiarlyqtaryn synǧa salǧan.
Qazaqstandyq jas fizikter joǧary daiyndyq deŋgeiın körsetıp, bes altyn medal ielengen. Ministrlık mälımetınşe, būl – Qazaqstannyŋ IPhO olimpiadasyna qatysu tarihyndaǧy eŋ üzdık nätije.
Astana qalasyndaǧy NURORDA mektep-liseiınıŋ 11-synyp oquşysy Nūrgül Egenbergenova, Astana qalasyndaǧy jaratylystanu-matematika baǧytyndaǧy NIS-tıŋ 12-synyp oquşysy Amirbek Azatbekov, Astana qalasyndaǧy Spectrum International School mektebınıŋ 12-synyp oquşysy İliias Qazymbek, Almaty qalasyndaǧy «Miras» halyqaralyq mektebınıŋ 12-synyp oquşysy Roman Cheremnov, Astana qalasyndaǧy jaratylystanu-matematika baǧytyndaǧy NIS-tıŋ 11-synyp oquşysy Damir Qūrman altyn medal iegerlerı atanǧan.
«Būl tarihi jetıstıkke ūlttyq qūrama üş jyl boiy jüielı daiyndaldy. Komandany mektep mūǧalımderı, tälımgerlerı jäne ūlttyq qūramanyŋ jattyqtyruşylary daiyndady. Daiyndyq jūmystaryna äl-Farabi atyndaǧy Qazaq ūlttyq universitetınıŋ aǧa oqytuşysy, PhD doktory Güliia Nūrbaqova jetekşılık ettı. Al Halyqaralyq fizika olimpiadasynda ūlttyq qūramanyŋ jūmysyn SDU universitetınıŋ aǧa oqytuşysy, PhD doktory Samat Maqsūtov pen fizikadan halyqaralyq olimpiadalardyŋ jüldegerı Alişer Erkebaev üilestırdı»,– delıngen habarlamada.
Aita keteiık, halyqaralyq fizika olimpiadasy 1967 jyldan berı ötkızılıp keledı. Qazaqstan būl bılım dodasyna 1997 jyldan berı tūraqty qatysyp keledı. 2025 jyly ūlttyq qūrama ekı kümıs jäne üş qola medal jeŋıp alǧan bolatyn.
