25 ماۋسىمعا قاراعان ءتۇنى ۆەنەسۋەلادا بولعان ەكى جويقىن جەر سىلكىنىسىنەن قازا تاپقاندار سانى 4 490 ادامعا جەتتى. بۇل تۋرالى ەلدىڭ ۇلتتىق اسسامبلەياسىنىڭ توراعاسى حورحە رودريگەس مالىمدەدى، دەپ حابارلايدى «ادىرنا» ءتىلشىسى.
بۇعان دەيىن رەسمي دەرەكتەردە 4 333 ادامنىڭ قازا بولعانى حابارلانعان ەدى. الايدا ىزدەستىرۋ-قۇتقارۋ جۇمىستارىنىڭ ناتيجەلەرى ناقتىلانعاننان كەيىن قۇرباندار سانى وسكەن.
بيلىك مالىمەتىنشە، تابيعي اپات ەل ينفراقۇرىلىمىنا ايتارلىقتاي زيان كەلتىرگەن. جالپى سانى 856 عيمارات زاقىمدانعان، ونىڭ 190-ى تولىقتاي قيراعان.
سونداي-اق نەگىزگى جەر استى دۇمپۋلەرىنەن كەيىن ماماندار 1 202 افتەرشوكتى تىركەگەن. بۇل قۇتقارۋ جۇمىستارىن قيىنداتىپ، تۇرعىندار ءۇشىن قاۋىپ-قاتەردى ارتتىرىپ وتىر.
تابيعي اپاتتىڭ سالدارىن جويۋ جۇمىستارىنا اۋقىمدى كۇشتەر تارتىلعان. قۇتقارۋ وپەراتسياسىنا توتەنشە جاعدايلار قىزمەتىنىڭ 31 837 قىزمەتكەرى، 30 مىڭنان استام ەرىكتى جانە كومەك كورسەتۋ ءۇشىن كەلگەن 2 422 شەتەلدىك قۇتقارۋشى قاتىسۋدا.
ەسكە سالايىق، 24 ماۋسىم كۇنى ۆەنەسۋەلانىڭ سولتۇستىگىندە، ەل استاناسى كاراكاستىڭ باتىسىندا اراعا نەبارى 39 سەكۋند سالىپ ماگنيتۋداسى 7,2 جانە 7,5 بولاتىن ەكى جەر سىلكىنىسى تىركەلگەن ەدى. بۇل – سوڭعى 125 جىلداعى ەلدەگى ەڭ قۋاتتى جەر سىلكىنىستەرى.
