فوتو: Francis Mascarenhas/REUTERS
نەپال مەن تيبەت شەكاراسىندا بولعان جويقىن سۋ تاسقىنى مەن كوشكىن سالدارىنان قازا تاپقاندار سانى 750 ادامعا جەتتى. ونىڭ 16-سى تيبەت اۋماعىندا كوز جۇمعان. بۇل تۋرالى The Kathmandu Post باسىلىمى جازدى، دەپ حابارلايدى "ادىرنا".
نەپال بيلىگىنىڭ سوڭعى مالىمەتىنشە، تابيعي اپات سالدارىنان ەلدە 750 ادام قازا تاۋىپ، 2 498 ادام حابار-وشارسىز كەتكەن. جوعالعاندار اراسىندا 589 شەتەل ازاماتى بار.
قازىرگى ۋاقىتتا اپاتتان زارداپ شەككەن بارلىق اۋدانداردا ىزدەستىرۋ-قۇتقارۋ جۇمىستارى جالعاسىپ جاتىر. قۇتقارۋ جانە گۋمانيتارلىق وپەراتسيالارعا 19 895 قاۋىپسىزدىك قىزمەتكەرى تارتىلعان. ولاردىڭ ىشىندە نەپال ارمياسىنىڭ 8 399 اسكەري قىزمەتشىسى، 7 213 پوليتسيا قىزمەتكەرى جانە قارۋلى پوليتسيا كۇشتەرىنىڭ 4 203 قىزمەتكەرى بار.
رەسمي دەرەككە سايكەس، كۇشتىك قۇرىلىمداردىڭ قىزمەتكەرلەرى اپات ايماعىنان 8 186 ادامدى قۇتقارعان.
جەرگىلىكتى تۇرعىنداردىڭ ايتۋىنشا، كەيبىر اۋدانداردا سۋ دەڭگەيىنىڭ قايتا كوتەرىلۋ قاۋپى ساقتالىپ وتىر. دحادينگ وكرۋگىنىڭ تۇرعىنى اتما شرەستحا سۋ تاسقىنىن باقىلاۋ قىزمەتىنەن ەكىنشى تولقىننىڭ جاقىنداعانى تۋرالى ەسكەرتۋ العانىن ايتتى.
ونىڭ سوزىنشە، وزەننىڭ جوعارعى بولىگىندە جينالعان سۋ اعىنى بوگەتتى بۇزىپ، تومەن قاراي باعىت العان. وسىعان بايلانىستى تۇرعىندارعا دەرەۋ قاۋىپسىز ءارى بيىك جەرگە كوشۋ تاپسىرىلعان.
تابيعي اپات قۇرباندارىنىڭ كوپ بولۋى مايىتتەردى سايكەستەندىرۋ جۇمىستارىن دا قيىنداتىپ وتىر. بيلىك اتى-ءجونى ازىرگە انىقتالماعان مارقۇمداردى ساقتاۋ جانە جەكە باسىن انىقتاۋ راسىمدەرىن جۇرگىزۋ ءۇشىن مايىتتەردى ءتۇرلى اۋداندارداعى 21 اۋرۋحاناعا جەتكىزگەن.
ەسكە سالايىق، 26 تامىزدا نەپالدىڭ سولتۇستىگىندە نوسەر جاۋىننان كەيىن سۋ تاسقىنى مەن كوشكىندەر بولىپ، ەلدى مەكەندەر، اۆتوموبيل جولدارى جانە باسقا دا ينفراقۇرىلىم نىساندارى زارداپ شەككەن ەدى. تابيعي اپات سالدارىنان جۇزدەگەن ادام قازا تاۋىپ، كوپتەگەن تۇرعىن حابار-وشارسىز كەتكەن.
قۇتقارۋ جۇمىستارىنا 13 مىڭنان استام ادام جۇمىلدىرىلعان. بۇعان دەيىن نەپال مەن قىتاي شەكاراسى ماڭىندا جۇرگەن ەكى قازاقستاندىق ايەلدەن دە حابار ۇزىلگەنى بەلگىلى بولعان ەدى.
