قاسيەتتى التاي تورىندە تۇركى جۇرتىنىڭ رۋحاني تامىرى مەن مادەني تۇتاستىعىن ايشىقتاعان ەڭ اۋقىمدى حالىقارالىق مادەني شارالاردىڭ ءبىرى – «التاي – تۇركى الەمىنىڭ التىن بەسىگى» فەستيۆالىنىڭ شارىقتاۋ ءساتى ءوتتى. شىعىس قازاقستان وبلىسىنىڭ كاتونقاراعاي اۋدانىندا ۇيىمداستىرىلعان ايتۋلى ونەر مەرەكەسىنە قازاقستاننىڭ تۇكپىر-تۇكپىرىنەن جانە الىس-جاقىن شەتەلدەردەن كەلگەن 50 مىڭعا جۋىق قوناق پەن كورەرمەن جينالدى.
سالتاناتتى شارانىڭ اشىلۋىندا ءسوز سويلەگەن شىعىس قازاقستان وبلىسىنىڭ اكىمى نۇرىمبەت ساقتاعانوۆ التايدىڭ تۇركى وركەنيەتىندەگى تاريحي ورنىنا توقتالدى.
"مىڭداعان جىلدار بويى التاي وركەنيەتتەر توعىسقان، ۇلى جىبەك جولىنىڭ ماڭىزدى تورابىنا اينالعان، رۋحاني قۋاتتىڭ قاينار كوزى بولعان قاسيەتتى ولكە رەتىندە تانىلىپ كەلەدى.
بۇگىندە ۇلى التاي ءوزىنىڭ تاريحي ميسسياسىن قايتا جاڭعىرتىپ، دوستار مەن نيەتتەس حالىقتاردىڭ باسىن قوسىپ وتىر. باۋىرلاس مەملەكەتتەردەن كەلگەن قادىرلى قوناقتارىمىزعا شىنايى ريزاشىلىعىمىزدى بىلدىرەمىز.
مەملەكەت باسشىسى قاسىم-جومارت كەمەلۇلى توقاەۆ تۇركى مەملەكەتتەرىنىڭ ورتاق تاريحي-مادەني مۇراسىن ساقتاۋ – كەلەر ۇرپاق الدىنداعى ورتاق جاۋاپكەرشىلىگىمىز ەكەنىن بىرنەشە رەت اتاپ ءوتتى. بۇگىندە جاڭا ادىلەتتى قازاقستان قۇندىلىقتارى اياسىندا بۇل سوزدەر ەرەكشە مانگە يە بولىپ وتىر. ءوزىنىڭ قالىپتاسۋ كەزەڭىنەن بەرى «التاي – تۇركى الەمىنىڭ التىن بەسىگى» حالىقارالىق فەستيۆالى ونەر، مۋزىكا جانە رۋحاني مۇرا سىندى ماڭگىلىك قۇندىلىقتار ارقىلى ءتۇرلى ەلدەردىڭ وكىلدەرىن توعىستىراتىن ايتۋلى حالىقارالىق مادەني شاراعا اينالدى، - دەدى وبلىس اكىمى ايماق باسشىسى.
شىعىس قازاقستان وبلىسى اكىمدىگىنىڭ قولداۋىمەن ۇيىمداستىرىلعان فەستيۆال تۇركى حالىقتارىنىڭ ورتاق تاريحىن، باي مادەني مۇراسىن جانە باۋىرلاس ەلدەر اراسىنداعى رۋحاني بايلانىستى دارىپتەۋگە باعىتتالعان. التايدىڭ سۇلۋ تابيعاتى اياسىندا ءوتىپ جاتقان مەرەكە بۇگىندە حالىقارالىق مادەني ۇنقاتىسۋدىڭ بەدەلدى الاڭىنا اينالىپ وتىر.
گالا-كونتسەرت تەاترلاندىرىلعان «پىراق» قويىلىمىمەن اشىلدى. ساق داۋىرىنەن باستاۋ الاتىن تۇركى دۇنيەسىنىڭ كيەلى سيمۆولى – اق قاناتتى تۇلپار بەينەسى ارقىلى ۇلى دالا وركەنيەتىنىڭ رۋحى، كوشپەندىلەر مادەنيەتىنىڭ بولمىسى جانە جىلقىنىڭ ادامزات تاريحىنداعى ايرىقشا ورنى زاماناۋي ساحنالىق شەشىمدەرمەن اسەرلى كورىنىس تاپتى.
كەش بارىسىندا قازاقستان مەن تۇركى الەمىنىڭ تانىمال ونەر جۇلدىزدارى ءبىر ساحنادا باس قوستى. ونەر سۇيەر قاۋىمعا قازاقستاننىڭ الەمگە ايگىلى ءانشىسى ديماش قۇدايبەرگەن مەن «سارمات» توبى، قاراقالپاقستاننان ەرباي نيازوۆ، ازەربايجاننان ەفەندي، وزبەكستاننان سەۆارا حانتۋلانوۆا، قىرعىزستاننان JAX, ماجارستاننان Nox توبى، تۇركيادان مۇرات ياپراك، باشقۇرتستاننان «حازينا» ءانسامبلى، موڭعوليادان سۋبەدەي سامدۋم مەن «وت» توبى، سونداي-اق تىۆا رەسپۋبليكاسىنان ايزانا ءوز ونەرلەرىن تارتۋ ەتتى.
الەمنىڭ ءار قيىرىنان كەلگەن ونەرپازداردىڭ باسىن قوسقان بۇل كەش تۇركى حالىقتارىنىڭ باي مۋزىكالىق مۇراسىن دارىپتەپ قانا قويماي، مادەني بايلانىستاردى نىعايتاتىن ءىرى حالىقارالىق ونەر الاڭىنا اينالدى.
فەستيۆالدىڭ باستى ەرەكشەلىگى – ونىڭ كەڭ حالىقارالىق اۋقىمىندا. كاتونقاراعايعا قازاقستاننىڭ بارلىق وڭىرلەرىنەن بولەك، تۇركيا، گەرمانيا، ازەربايجان، وزبەكستان، قىرعىزستان، ماجارستان، موڭعوليا جانە رەسەي فەدەراتسياسىنىڭ تۇركى رەسپۋبليكالارىنان كەلگەن قوناقتار جينالىپ، التاي تورىندەگى رۋحاني مەرەكەنىڭ كۋاسى بولدى.
وسىلايشا، «التاي – تۇركى الەمىنىڭ التىن بەسىگى» حالىقارالىق فەستيۆالى تاريحي تامىرلاستىقتى، مادەني ساباقتاستىقتى جانە حالىقتار دوستىعىن دارىپتەيتىن ماڭىزدى حالىقارالىق الاڭ رەتىندەگى مارتەبەسىن تاعى ءبىر مارتە ايقىندادى. ال 50 مىڭعا جۋىق كورەرمەننىڭ باسىن قوسقان گالا-كونتسەرت ءتور التاي اسپانىن اسەم اۋەنگە بولەپ، فەستيۆال تاريحىنداعى ەڭ جارقىن ءارى ەستە قالارلىق ساتتەردىڭ بىرىنە اينالدى.
