ماجىلىستە ءۇش جارىم جىلعا جۋىق قىزمەت اتقارعان دەپۋتات باقىتجان بازاربەك پارلامەنتتەگى جۇمىسىن اياقتادى. بۇل تۋرالى ول الەۋمەتتىك جەلىدەگى پاراقشاسىندا جازدى، دەپ حابرلايدى "ادىرنا".
«پارلامەنتتەگى ءۇش جارىم جىلدىق قىزمەتىمدە ەلىمە جانە حالقىما ادال ءارى ءپرينتسيپتى تۇردە قىزمەت ەتۋگە تىرىستىم. ءماجىلىستىڭ بەلسەندى دەپۋتاتتارىنىڭ بىرىنە اينالدىم. ەگەر حالىقتىڭ سەنىمى مەن قۇرمەتىنە يە بولا السام، دەمەك، ءجۇرىپ وتكەن جولىم زايا كەتپەگەنى»، – دەپ جازدى ول.
بازاربەك الداعى ۋاقىتتا ءومىرىنىڭ جاڭا كەزەڭى باستالاتىنىن ايتىپ، كەز كەلگەن وزگەرىس جاڭا مۇمكىندىكتەرگە جول اشاتىنىن جەتكىزدى. سونداي-اق وسى ۋاقىتقا دەيىن وزىنە قولداۋ كورسەتىپ، سەنىم بىلدىرگەن ازاماتتارعا العىسىن ءبىلدىردى.
«ەندى مەن ەركىنمىن. ومىرىمدە جاڭا كەزەڭ باستالادى. ءبىر ەسىك جابىلسا، ەكىنشىسى اشىلادى»، – دەدى دەپۋتات.
باقىتجان بازاربەك ماجىلىستەگى قىزمەتى بارىسىندا جەر زاڭناماسى، قالا قۇرىلىسى جانە سىبايلاس جەمقورلىققا قارسى كۇرەس ماسەلەلەرىن بەلسەندى كوتەردى. ول الماتى مەن استاناداعى بەيبەرەكەت قۇرىلىسقا، سەيسميكالىق قاۋىپتى ايماقتار مەن تاۋ بوكتەرىندەگى زاڭسىز نىسانداردىڭ سالىنۋىنا قارسى پىكىر ءبىلدىرىپ، ولاردى توقتاتۋدى تالاپ ەتتى.
سونىمەن قاتار ءىرى لاتيفۋنديستەر مەن وليگارحتاردىڭ يەلىگىنە زاڭسىز وتكەن جايىلىمدىق جانە اۋىل شارۋاشىلىعى جەرلەرىن مەملەكەتكە قايتارۋ ماسەلەسىن تۇراقتى كوتەرىپ، وسى باعىتتاعى زاڭنامالىق وزگەرىستەردىڭ قابىلدانۋىنا باستاماشى بولدى.
الەۋمەتتىك جەلى قولدانۋشىلارى ماجىلىستەگى بەلسەندى ءارى ءپرينتسيپشىل دەپۋتاتتاردىڭ ءبىرى سانالاتىن باقىتجان بازاربەكتىڭ جاڭا قۇرامنان تىس قالعانىنا قاتىستى ءتۇرلى پىكىر بىلدىرۋدە.
