استانادا اۆتونەسيە ارقىلى ازاماتتار مەن بانكتەردى الداعان قىلمىستىق توپقا قاتىستى سوت ۇكىمى جاريالاندى، دەپ حابارلايدى "ادىرنا" ءتىلشىسى.
سوت دەرەگىنشە، توپ مۇشەلەرى 96 اۆتوكولىكتى زاڭسىز يەمدەنىپ، جوق 47 كولىككە نەسيە راسىمدەۋ ارقىلى جالپى كولەمى شامامەن 2 ملرد تەڭگە شىعىن كەلتىرگەن.
سوتتا انىقتالعانداي، قىلمىستىق توپتىڭ قۇرامىندا 13 ادام بولعان. ولاردىڭ قاتارىندا بانك قىزمەتكەرلەرى، «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتكەرلەرى، كولىك تاسىمالداۋشىلار مەن دەلدالدار بولعان.
تەرگەۋ نۇسقاسى بويىنشا، الاياقتار ازاماتتارعا اۆتوكولىكتى نەسيەگە الىپ، كەيىن ونى ءتيىمدى شارتپەن جالعا بەرۋدى ۇسىنعان. نەسيە راسىمدەۋ كەزىندە ءوتىنىش بەرۋشىلەردىڭ تابىسى جاساندى تۇردە جوعارى كورسەتىلىپ، بانك ماقۇلداۋىن الۋ جەڭىلدەتىلگەن.
نەسيەگە الىنعان كولىكتەر كەيىن ۇيىمداسقان توپ مۇشەلەرىنىڭ قولىنا ءوتىپ، ولاردىڭ ءبىر بولىگى كارشەرينگتە پايدالانىلعانىمەن، باسىم بولىگى رەسەيگە شىعارىلىپ، ەسەپتەن الىنىپ ساتىلعان. وسى سحەما ناتيجەسىندە 70-تەن استام قازاقستاندىق 1 ملرد تەڭگەدەن استام شىعىنعا ۇشىراعان.
سونىمەن قاتار، تەرگەۋ بارىسىندا «ازاماتتارعا ارنالعان ۇكىمەت» قىزمەتكەرلەرىنىڭ قاتىسۋىمەن مۇلدە بولماعان اۆتوكولىكتەردىڭ تىركەلگەنى انىقتالدى. قىلمىستىق توپ جالعان قۇجاتتار ازىرلەپ، VIN-كودتار مەن مەملەكەتتىك نومىرلەر جاساپ، كەيىن سول «كولىكتەرگە» ءۇشىنشى تۇلعالار ارقىلى نەسيە راسىمدەگەن. وسىلايشا جالپى قۇنى 743 ملن تەڭگەگە جۋىق 47 جالعان اۆتوكولىك راسىمدەلگەن.
سوت ۇكىمىمەن قىلمىستىق توپتىڭ جەتەكشىسى 10 جىلعا باس بوستاندىعىنان ايىرىلدى. قالعان مۇشەلەرى 6 جىلدان 8 جىلعا دەيىن، ال مەملەكەتتىك كورپوراتسيانىڭ قىزمەتكەرلەرى 3 جىلعا جەتپەيتىن مەرزىمگە سوتتالدى.
