9 شىلدەدە پروكۋرور اتىراۋ وبلىسىندا ءتورت ادامدى ءولتىردى دەپ ايىپتالعان سۇلتان سارسەماليەۆكە ءومىر بويىنا باس بوستاندىعىنان ايىرۋ جازاسىن تاعايىنداۋدى سۇرادى، دەپ حابارلايدى «ادىرنا» ءتىلشىسى.
بۇگىن اتىراۋ وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىندا جانگەلدين اۋىلىنداعى ءبىر وتباسىنىڭ ءتورت مۇشەسىنىڭ ولىمىنە قاتىستى ءىس بويىنشا سوت ءجارىسسوزى اياقتالدى.
مەملەكەتتىك ايىپتاۋشى ميراس باۋىرجانوۆ اسا ءىرى كولەمدەگى ۇرلىق ءۇشىن – 6 جىل، الاياقتىق ءۇشىن – 6 جىل، مال ۇرلىعى ءۇشىن – 4 جىل، قۇجاتتاردى زاڭسىز الىپ قويۋ، جويۋ جانە جاسىرۋ فاكتىسى ءۇشىن – 60 اەك مولشەرىندە ايىپپۇل تاعايىنداۋدى سۇرادى. الايدا بارلىق ايىپتى ەسكەرە وتىرىپ، تۇپكىلىكتى جازا رەتىندە ءومىر بويىنا باس بوستاندىعىنان ايىرۋ جازاسىن تاعايىنداۋدى جانە جازانى توتەنشە قاۋىپسىزدىك مەكەمەسىندە وتەۋدى ۇسىندى.
«قايتىس بولعان كىسىلەر وعان سەنىم ارتتى. سوتتالۋشى وزىنە سەنىم بىلدەرگەن ادامداردىڭ ومىرىنە قول سۇقتى»، – دەدى پروكۋرور.
بۇعان دەيىن سارسەماليەۆ كەز كەلەن اۋىر جازاعا دا دايىن ەكەنىن ايتقان ەدى.
ايتا كەتەيىك، اتىشۋلى ءىس بويىنشا سوت وتىرىسى 18 مامىردا باستالعان بولاتىن.
