جاس كاسىپكەر: ۇكىمەتتەن ىستەيمىن دەگەن ادامعا بەرىلەتىن مۇمكىندىكتەر وتە كوپ!

2026
Adyrna.kz Telegram

قازىرگى جاھاندانۋ زامانىندا ۇيدە وتىرىپ-اق تابىس تاۋىپ، بالانى دا تاربيەلىپ، كاسىپتى دە دوڭگەلەتىپ وتىرعان ىسكەر قىز-كەلىنشەكتەر قاتارى كوبەيىپ كەلەدى. باتىس قازاقستان وبلىسى، بايتەرەك اۋدانى، دوستىق اۋىلىندا تۇراتىن گۇلجاينات قۋانىشەۆا تىگىنشىلىك سالاسىن كاسىپ ەتىپ، تابىس كوزىنە اينالدىرىپ وتىر. بەس ساۋساعىنان بال تامعان تىگىنشى "ادىرنا" ۇلتتىق پورتالىنىڭ تىلشىسىنە ء"بىزدىڭ ەلىمىزدە سۇيىكتى ىسىمەن اينالىسقىسى كەلەتىن ادامعا ۇكىمەتتەن بەرىلەتىن مۇمكىندىكتەر وتە كوپ" دەپ، مەملەكەتتەن قالاي گرانت ۇتىپ، پەردە تىگۋ بيزنەسىن باستاعانىن ايتىپ بەردى. 

"مەنىڭ ەسىمىم - گۇلجاينات قۋانىشەۆا. جاسىم - 28 دە. ءوزىم اقتوبە وبلىسىنىڭ تۋماسىمىن. باتىس قازاقستان وبلىسى، بايتەرەك اۋدانى، دوستىق اۋىلىنا كەلىنمىن. ەكى بالانىڭ اناسىمىن. گرانت العانعا دەيىن دەكرەتتە وتىرعان انا ەدىم. بىلتىر وسىنداي گرانت بولاتىنىن ەستىپ، جەرگىلىكتى اكىمدىككە بارىپ، سۇراستىرعان بولاتىنمىن. اۋدانعا بارىپ ءوتىنىش جازىپ، "بيزنەس باستاۋدىڭ" 21 كۇندىك وقۋىن ونلاين وقىپ ءبىتىردىم. سودان سوڭ بيزنەس-جوسپار جاسادىم. ونى تاپسىرىپ، ناتيجەسىن كۇتتىم. ءسويتىپ بىلتىر قاراشا ايىندا "بيزنەس-جوسپارىڭىز كونكۋرستان ءوتتى" دەگەن حابار كەلىپ، ۇكىمەتتەن سۇيىكتى ءىسىم "پەردە تىگۋ" بيزنەسىن دامىتۋىما 583 مىڭ 400 تەڭگە قايتارىمسىز گرانت ۇتىپ الدىم. ءوزىم تىگىنشىلىكتى وسىدان 2 جىل بۇرىن وقىپ، 4 ايلىق ارنايى اقىلى كۋرستان ءوتىپ، بىتىرگەن ەدىم. گرانتقا تاپسىرعان كەزدە وسى تىگىنشىلىك سالاسىن جالعاستىرۋدى ءجون كوردىم", - دەيدى كاسىپكەر.

 

بەس ساۋساعىنان بال تامعان تىگىنشىنىڭ قولىنان كەلمەيتىن ءىسى جوق.

"گرانت الماس بۇرىن مەن ۇيدە ءوزىمنىڭ كىشكەنتاي تۇرمىستىق تىگىن ماشيناممەم كيىمدەردى جوندەپ، ۇساق-تۇيەك زاتتاردى تىگۋمەن اينالىسىپ جۇرگەن بولاتىنمىن. گرانت تۋرالى ەستىگەننەن كەيىن تىگىنشىلىكتى ارى جالعاستىرىپ، سۇيىكتى كاسىبىمدى دامىتامىن دەپ شەشتىم. گرانتتىق قاراجاتقا وندىرىستىك وۆەرلوك، تىگىن ماشيناسىن،  ماشيناسىن، بۋ شىعاراتىن ۇتەك الدىم. ياعني "پەردە تىگۋ" بيزنەسىنە قاجەت باستى زاتتاردى ساتىپ الدىم. قازىرگى تاڭدا ۇيدەن جۇمىس جاساپ وتىرمىن. قاراشا ايىنان بەرى تاپسىرىس بەرۋشىلەردىڭ سانى ارتىپ، تابىسىم دا اقىرىنداپ ءوسىپ كەلەدى. كورشى-قولاڭ، اۋىلداستارىم، تۋعان-تۋىسقاندارىمنىڭ قاجەتتىلىكتەرىن شاما-شارقىمشا وتەپ وتقان جايىم بار. تاپسىرىسقا پەردە، ءار ءتۇرلى كورپە تىستارىن تىگەمىن، كورپەشەلەر قاپتايمىن. سونداي-اق بالالارعا، ايەل ادامدارعا كاجەكەي، تاقيا تىگەمىن. ءتاي-ءتاي جولداردى تىگەمىن. سول سياقتى ت.ب. ءوزىمنىڭ تىگىن ماشيناممەن تىگە الاتىن، قولىمنان كەلەتىن زاتتاردى تىگىپ وتىرمىن", -دەيدى گۇلجاينات قۋانىشەۆا. 

تىگىنشىگە اۋىل تۇرعىندارىنان، قالا سىرتىنان دا ارنايى تاپسىرىس بەرەتىندەر كوپ.

"اۋىلىمىز ورال قالاسىنان 15 شاقىرىمدىق جەردە ورنالاسقان. قاتتى الىس ەمەس. سوندىقتان مەن تەك اۋىل ىشىنەن عانا ەمەس، سونداي-اق ورال قالاسىنان دا تاپسىرىستار الامىن. الەۋمەتتىك جەلىلەردى دە ۇتىمدى پايدالانىپ، اۋىلداعى جارنامالىق پاراقشالاردىڭ كومەگىمەن كاسىبىمدى كەڭىنەن ناسيحاتتاپ، جارناما جاساپ، تاپسىرىس الىپ وتىرمىن. وزىم سياقتى قىز-كەلىنشىكتەرگە، انالارعا بەرەر كەڭەسىم: ۇيدە وتىرۋمەن شەكتەلىپ قانا قويماي، سونىمەن قاتار وزدەرىڭىزگە ۇنامدى، سۇيىكتى ىستەرىڭىز بولسا، ونى باستاۋعا نە بولماسا ءارى قاراي جالعاستىرۋعا، دوڭگەلەتىپ الىپ كەتۋگە وتە كوپ مۇمكىندىكتەر بار. ەڭ باستىسى تابىس تاۋىپ، ۇيدە وتىرۋمەن شەكتەلمەسە ەكەن دەيمىن. ويتكەنى، ءوزىم دە بۇرىن بالامەن ۇيدە وتىرىپ، جۇمىس ىستەۋگە بولاتىنىنا سەنبەيتىن ەدىم. قازىر ەندى ۇيدەن جۇمىس ىستەپ، ارمانىمدى ىسكە اسىرىپ وتقان جايىمىز بار. ەڭ باستىسى، جاقسى نيەت ەتىپ، دۇرىس بيزنەس-جوسپار قۇرساڭىزدار، ءبارى دە مۇمكىن. ۇكىمەتتەن ىستەيمىن دەگەن ادامعا بەرىلەتىن مۇمكىندىكتەر وتە كوپ. الدىما قويىپ وتقان ماقساتىم، ارمانىمنىڭ ءبىرى - وسى كاسىبىمدى پەردە تسەحى رەتىندە ۇلكەيتىپ اشقىم كەلەدى. سول ءۇشىن الداعى ۋاقىتتاردا ۇكىمەتكە ءىرى كولەمدى گرانتتارعا تاعى ءبىر مارتە تاپسىرىپ، ءوتىنىش بەرۋگە نيەتتەنىپ وتىرمىن", - دەيدى جاس كاسىپكەر.

 

اڭگىمەلەسكەن زارينا اشىربەك،

"ادىرنا" ۇلتتىق پورتالى

پىكىرلەر