مەملەكەت باسشىسى قاسىم-جومارت توقاەۆ قازاقستاندىقتاردى ۇلتتىق دومبىرا كۇنىمەن قۇتتىقتادى. بۇل تۋرالى 5 شىلدەدە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
پرەزيدەنتتىڭ ايتۋىنشا، قوس ىشەكتى قاسيەتتى اسپاپ عاسىرلار بويى ۇلتتىڭ ۇنىنە اينالىپ، ۇرپاقتار ساباقتاستىعىن ساقتاۋعا قىزمەت ەتىپ كەلەدى.
«دومبىرا ارقىلى تەرەڭنەن تامىر تارتقان ءتول قۇندىلىقتارىمىز جۇرت جادىندا جاڭعىرىپ، تورگە وزادى. وسىلايشا، داۋىرلەر مەن ۇرپاقتار اراسىنداعى ساباقتاستىق ساقتالىپ كەلەدى.
شىن مانىندە، ۇلتتىڭ ءۇنى سانالاتىن قاسيەتتى اسپابىمىز قۋانىشتى ساتتەردە دە، قيىن كەزدەردە دە بەرەكەلى بىرلىگىمىزدى نىعايتىپ، ەلدىڭ رۋحىن اسقاقتاتۋعا سەبەپكەر بولدى. دومبىرانىڭ كۇمبىرى ازاماتتارىمىزدى جىگەرلەندىرەدى، العا نىق قادام جاساۋدى كوزدەگەن رۋحاني باعىت-باعدارىمىزبەن ۇندەسەدى»،–دەدى ول.
قاسىم-جومارت توقاەۆ دومبىرا قازاق مادەنيەتىنىڭ مىزعىماس تۇعىرى بولىپ قالا بەرەتىنىن جەتكىزدى.
«جاھاندىق سىن-قاتەرلەر كۇشەيىپ، ءداستۇرلى قۇندىلىقتار كومەسكىلەنگەن قازىرگىدەي الماعايىپ زاماندا ۇلى دالانىڭ مول مۇراسى، اسىرەسە، قارا دومبىرامىز ءتول مادەنيەتىمىزدىڭ مىزعىماس تۇعىرى بولىپ قالا بەرەدى.
حالىقارالىق قاۋىمداستىققا قازاق دومبىراسىنىڭ سازدى اۋەنىن تانىستىرۋ – ءبىزدىڭ جالپىۇلتتىق پارىزىمىز. اسا كورنەكتى اقىن قادىر مىرزا ءالىنىڭ «ناعىز قازاق – دومبىرا» دەگەن تاماشا تەڭەۋى دومبىرانى كەڭىنەن دارىپتەۋ ىسىندە تەمىرقازىق ىسپەتتەس بولۋعا ءتيىس دەپ ويلايمىن. 1 شىلدەدە، ياعني دومبىرا كۇنى قارساڭىندا مەملەكەتتىلىك جىلناماسىنىڭ جاڭا پاراعىن اشقان حالىق كونستيتۋتسياسى زاڭدى كۇشىنە ەندى. مۇنىڭ سيمۆولدىق ءمانى ايرىقشا.
تاريحي-مادەني مۇرانى ساقتاۋ، ءتول مادەنيەتتى قولداۋ العاش رەت شىن مانىندە حالىق اتا زاڭىنىڭ نەگىزگى قاعيداتى رەتىندە ايقىندالدى. بۇل ءوسىپ-وركەندەۋگە بەت العان حالقىمىزدىڭ ءبىتىم-بولمىسىنا، ماقسات-مۇددەسىنە تولىق ساي كەلەتىنى ءسوزسىز»،–دەدى پرەزيدەنت.
مەملەكەت باسشىسى دومبىراشىلارعا، ۇستازدارعا جانە ۇلتتىق ونەردى ەلىمىزدە ءارى شەتەلدە ناسيحاتتاپ جۇرگەن ازاماتتارعا العىس ءبىلدىرىپ، قازاقتىڭ ءان-كۇيى حالىققا شابىت بەرىپ، ادىلەتتى ءارى قۋاتتى قازاقستاندى قۇرۋ جولىندا جاڭا جەتىستىكتەرگە جەتەلەي بەرەتىنىن اتاپ ءوتتى.
ايتا كەتەيىك، قازاقستاندا شىلدەنىڭ ءبىرىنشى جەكسەنبىسىندە ۇلتتىق دومبىرا كۇنى تويلانادى.
