استانادا Respublica پارتياسىنىڭ كەزەكتەن تىس سەزى ءوتتى، دەپ حابارلايدى "ادىرنا" ۇلتتىق پورتالى.
وندا پارتيانىڭ الداعى دامۋ باعىتى ايقىندالىپ، سايلاۋالدى ناۋقانعا قاتىستى نەگىزگى شەشىمدەر قابىلداندى.
سەزگە پارتيا باسشىلىعى، ورتالىق جانە وڭىرلىك كەڭەستەردىڭ مۇشەلەرى، فيليال توراعالارى، دەپۋتاتتار، سونداي-اق Respublica Jastary جانە ReWomen قاۋىمداستىقتارىنىڭ بەلسەندىلەرى قاتىستى.
جيىندا پارتيانىڭ سوڭعى ءۇش جىلداعى جۇمىسى قورىتىندىلاندى. وسى كەزەڭدە پارتيا زاڭ شىعارۋ باستامالارىن ۇسىنىپ، ازاماتتاردىڭ 12 مىڭنان استام ءوتىنىشىن قاراعانى، جاستار مەن ايەلدەرگە ارنالعان ءبىلىم بەرۋ جوبالارىن جۇزەگە اسىرىپ، كادرلىق رەزەرۆ قالىپتاستىرعانى ايتىلدى.
دەلەگاتتار پارتيا جارعىسىنا ەنگىزىلەتىن وزگەرىستەر مەن تولىقتىرۋلاردى ماقۇلدادى. وزگەرىستەر كونستيتۋتسيا تالاپتارىنا سايكەستەندىرىلىپ، پارتياىشىلىك باسقارۋ جۇيەسىن جەتىلدىرۋگە، وڭىرلىك ۇيىمداردىڭ ءرولىن كۇشەيتۋگە جانە ىشكى پارتيالىق دەموكراتيانى دامىتۋعا باعىتتالعان.
سەزد بارىسىندا Respublica پارتياسىنىڭ جاڭا سايلاۋالدى باعدارلاماسى بەكىتىلدى. «ازاماتتىڭ يگىلىگى – جاۋاپتى قوعام – ءتيىمدى مەملەكەت – قاۋىپسىز ەل» قاعيداتىنا نەگىزدەلگەن باعدارلامادا كاسىپكەرلىكتى قولداۋ، جاڭا جۇمىس ورىندارىن قۇرۋ، مەملەكەتتىك باسقارۋدى جاڭعىرتۋ، ءبىلىم بەرۋ مەن دەنساۋلىق ساقتاۋ ساپاسىن ارتتىرۋ، تسيفرلاندىرۋ، قۇقىقتىق ينستيتۋتتاردى نىعايتۋ، ادامي كاپيتالدى دامىتۋ جانە قوعامدىق قاۋىپسىزدىكتى قامتاماسىز ەتۋگە باعىتتالعان باستامالار قامتىلعان.
پارتيا توراعاسى ايداربەك قوجانازاروۆ قازاقستاننىڭ باستى بايلىعى – ادام كاپيتالى ەكەنىن اتاپ ءوتىپ، ەكونوميكانىڭ جاڭا سالالارىن دامىتۋ مەن ادال باسەكەنى قولدايتىن مەملەكەت قۇرۋدىڭ ماڭىزىن ايتتى. سەزدە سايلاۋعا قاتىساتىن پارتيانىڭ كانديداتتار ءتىزىمى دە بەكىتىلدى. 76 ۇمىتكەردەن قۇرالعان ءتىزىم جاڭارۋ، كاسىبيلىك جانە كەڭ قوعامدىق وكىلدىك قاعيداتتارىنا ساي جاساقتالعان.
كانديداتتاردىڭ ورتاشا جاسى – 40,9 جاس. تىزىمگە 44 ەر ادام، 32 ايەل، 11 جاس ۇمىتكەر، مۇگەدەكتىگى بار ءۇش ازامات، سونداي-اق PolitIQ مەكتەبى مەن پارتيانىڭ كادرلىق رەزەرۆىنەن شىققان 10 تۇلەك ەنگىزىلگەن. سونىمەن قاتار دەلەگاتتار ايداربەك قوجانازاروۆنىڭ وكىلەتتىك مەرزىمىن تاعى ءۇش جىلعا ۇزارتۋ تۋرالى شەشىم قابىلداپ، باقىلاۋ-تەكسەرۋ كوميسسياسىنىڭ جاڭارتىلعان قۇرامىن بەكىتتى.
قازاقستاندا 1 شىلدەدەن باستاپ جاڭا كونستيتۋتسيا كۇشىنە ەنىپ، پرەزيدەنت قاسىم-جومارت توقاەۆ 23 تامىزعا قۇرىلتاي سايلاۋىن جاريالادى. ەلدە ەندى ءبىر پالاتالى پارلامەنت جاساقتالادى. وعان بىرنەشە پارتيا قاتىسۋى مۇمكىن. قازاقستاندا تىركەلگەن ساياسي پارتيا سانى - جەتەۋ.
