Astanada Respublica partiiasynyŋ kezekten tys sezı öttı, dep habarlaidy "Adyrna" ūlttyq portaly.
Onda partiianyŋ aldaǧy damu baǧyty aiqyndalyp, sailaualdy nauqanǧa qatysty negızgı şeşımder qabyldandy.
Sezge partiia basşylyǧy, Ortalyq jäne öŋırlık keŋesterdıŋ müşelerı, filial töraǧalary, deputattar, sondai-aq Respublica Jastary jäne ReWomen qauymdastyqtarynyŋ belsendılerı qatysty.
Jiynda partiianyŋ soŋǧy üş jyldaǧy jūmysy qorytyndylandy. Osy kezeŋde partiia zaŋ şyǧaru bastamalaryn ūsynyp, azamattardyŋ 12 myŋnan astam ötınışın qaraǧany, jastar men äielderge arnalǧan bılım beru jobalaryn jüzege asyryp, kadrlyq rezerv qalyptastyrǧany aityldy.
Delegattar partiia Jarǧysyna engızıletın özgerıster men tolyqtyrulardy maqūldady. Özgerıster Konstitusiia talaptaryna säikestendırılıp, partiiaışılık basqaru jüiesın jetıldıruge, öŋırlık ūiymdardyŋ rölın küşeituge jäne ışkı partiialyq demokratiiany damytuǧa baǧyttalǧan.
Sezd barysynda Respublica partiiasynyŋ jaŋa sailaualdy baǧdarlamasy bekıtıldı. «Azamattyŋ igılıgı – Jauapty qoǧam – Tiımdı memleket – Qauıpsız el» qaǧidatyna negızdelgen baǧdarlamada käsıpkerlıktı qoldau, jaŋa jūmys oryndaryn qūru, memlekettık basqarudy jaŋǧyrtu, bılım beru men densaulyq saqtau sapasyn arttyru, sifrlandyru, qūqyqtyq instituttardy nyǧaitu, adami kapitaldy damytu jäne qoǧamdyq qauıpsızdıktı qamtamasyz etuge baǧyttalǧan bastamalar qamtylǧan.
Partiia töraǧasy Aidarbek Qojanazarov Qazaqstannyŋ basty bailyǧy – adam kapitaly ekenın atap ötıp, ekonomikanyŋ jaŋa salalaryn damytu men adal bäsekenı qoldaityn memleket qūrudyŋ maŋyzyn aitty. Sezde sailauǧa qatysatyn partiianyŋ kandidattar tızımı de bekıtıldı. 76 ümıtkerden qūralǧan tızım jaŋaru, käsıbilık jäne keŋ qoǧamdyq ökıldık qaǧidattaryna sai jasaqtalǧan.
Kandidattardyŋ ortaşa jasy – 40,9 jas. Tızımge 44 er adam, 32 äiel, 11 jas ümıtker, mügedektıgı bar üş azamat, sondai-aq PolitIQ mektebı men partiianyŋ kadrlyq rezervınen şyqqan 10 tülek engızılgen. Sonymen qatar delegattar Aidarbek Qojanazarovnyŋ ökılettık merzımın taǧy üş jylǧa ūzartu turaly şeşım qabyldap, Baqylau-tekseru komissiiasynyŋ jaŋartylǧan qūramyn bekıttı.
Qazaqstanda 1 şıldeden bastap jaŋa Konstitusiia küşıne enıp, prezident Qasym-Jomart Toqaev 23 tamyzǧa Qūryltai sailauyn jariialady. Elde endı bır palataly parlament jasaqtalady. Oǧan bırneşe partiia qatysuy mümkın. Qazaqstanda tırkelgen saiasi partiia sany - jeteu.
