قىرعىزستان مەملەكەتتىك ۇلتتىق قاۋىپسىزدىك كوميتەتىنىڭ بۇرىنعى توراعاسى قامشىبەك تاشيەۆ ەل پرەمەر-ليگاسىنىڭ «مۇراس يۋنايتەد» پەن «ازياگول» كوماندالارى اراسىنداعى فۋتبول ماتچىن تاماشالادى، دەپ حابارلايدى "ادىرنا" ۇلتتىق پورتالى 24.kg سىلتەپ.
كەزدەسۋ ماناس قالاسىنداعى «قۇرمانبەك» ستاديونىندا ءوتتى.
الەۋمەتتىك جەلىلەردە تاراعان بەينەجازبالاردا قامشىبەك تاشيەۆتىڭ جانكۇيەرلەر اراسىمەن ءجۇرىپ ءوتىپ، كەيىن VIP-تريبۋناعا كوتەرىلگەنى كورىنەدى.
ەسكە سالايىق، بۇعان دەيىن بىشكەكتىڭ ءبىرىنشى ماي اۋداندىق سوتى «75-ءتىڭ حاتى» دەپ اتالاتىن ءىس بويىنشا ۇكىمگە قاتىستى تۇسىنىكتەمە بەرگەن بولاتىن. سوت شەشىمىنە سايكەس، قامشىبەك تاشيەۆ جانە وسى ءىس بويىنشا وزگە ايىپتالۋشىلار قىرعىزستان قىلمىستىق كودەكسىنىڭ «بيلىكتى كۇشپەن باسىپ الۋعا ارەكەت جاساۋ» بابى بويىنشا كىنالى دەپ تانىلىپ، مۇلكى تاركىلەنە وتىرىپ ءتورت جىلعا باس بوستاندىعىنان ايىرىلدى.
سونىمەن بىرگە سوت تاعايىندالعان جازا مەرزىمىن ءۇش جىلدىق پروباتسيالىق باقىلاۋمەن الماستىرۋ تۋرالى شەشىم قابىلدادى.
