فوتو: John McArthur / Unsplash
اقش-تا JetBlue اۋە كومپانياسىنا تيەسىلى Airbus A321 جولاۋشىلار ۇشاعى قونۋعا بەت العان كەزدە درونمەن سوقتىعىستى. ۇشاق لاس-ۆەگاستان نيۋ-يورككە باعىت العان بولاتىن.
الدىن الا مالىمەت بويىنشا، وقيعا جەرگىلىكتى ۋاقىتپەن تاڭعى ساعات 07:15 شاماسىندا، اۋە كەمەسى شامامەن 900 مەتر بيىكتىكتە ۇشىپ كەلە جاتقان كەزدە بولعان. ەكيپاج اۋە قوزعالىسىن باسقارۋ قىزمەتىنە دروننىڭ ۇشقىشتار كابيناسىنىڭ ۇستىڭگى بولىگىنە تيگەنىن حابارلاعان.
سوعان قاراماستان ۇشقىشتار توتەنشە جاعداي جاريالاماي، رەيستى شتاتتىق رەجيمدە جالعاستىردى. ۇشاق نيۋ-يوركتەگى دجون كەننەدي حالىقارالىق اۋەجايىنا امان-ەسەن قونىپ، جولاۋشىلار قاۋىپسىز تۇردە ءتۇسىرىلدى.
قونعاننان كەيىن اۋە كەمەسى تولىق تەحنيكالىق تەكسەرۋدەن ءوتتى. الايدا ماماندار ۇشاقتىڭ سىرتقى بولىگىنەن ەشقانداي زاقىم نەمەسە درونمەن سوقتىعىسقانىن راستايتىن ىزدەردى انىقتاماعان.
وقيعاعا بايلانىستى تەرگەۋدى اقش-تىڭ فەدەرالدىق اۆياتسيا باسقارماسى (FAA) باستادى. ۆەدومستۆونىڭ مالىمەتىنشە، ەلدەگى اۋەجايلار ماڭىندا درونداردىڭ زاڭسىز ۇشۋىنا قاتىستى اي سايىن جۇزدەن استام حابارلاما تىركەلەدى.
FAA مۇنداي ارەكەتتەر ازاماتتىق اۆياتسيا قاۋىپسىزدىگىنە ەلەۋلى قاتەر توندىرەتىنىن اتاپ ءوتتى. زاڭسىز درون ۇشىرعان تۇلعالارعا ءىرى كولەمدە ايىپپۇل سالىنىپ، كەي جاعدايدا قىلمىستىق جاۋاپكەرشىلىككە تارتىلۋى مۇمكىن.
