Europalyq odaq Qazaqstan aumaǧynda bosqyndardy ornalastyru ortalyqtaryn qūru mäselesı boiynşa eşqandai kelıssöz jürgızıp jatqan joq. Būl turaly Qazaqstandaǧy Europalyq odaqtyŋ elşısı Aleşka Simkich aitty, dep habarlaidy "Adyrna".
Onyŋ aituynşa, EO qabyldaǧan jaŋartylǧan köşı-qon paktı üş negızgı baǧytqa negızdelgen. Bırınşısı – zaŋsyz köşı-qonnyŋ aldyn alu jäne adam saudasymen ainalysatyn qylmystyq toptarǧa qarsy küres. Ekınşısı – soǧys pen qudalaudan qaşqan adamdarǧa halyqaralyq qorǧau körsetu. Üşınşısı – Europaǧa bılıktı mamandardy tartu.
Elşı jaŋa pakt aiasynda engızılgen ekı maŋyzdy özgerıske de toqtaldy. Endı Europalyq odaqqa müşe memleketter baspana sūraǧan azamattardyŋ ötınışın olardy el aumaǧyna kırgızbei-aq, şekarada qabyldap, 12 aptaǧa deiın qarai alady. Osy merzımnen keiın ötınış boiynşa şeşım qabyldanady.
Sondai-aq jaŋa erejelerge säikes, baspana alu turaly ötınışı qanaǧattandyrylmaǧan ärı EO aumaǧynda qaluǧa qūqyǧy joq adamdardy olardyŋ tuǧan elıne emes, üşınşı memleketke jıberu mümkındıgı qarastyrylǧan. Alaida Aleşka Simkich būl norma älı tolyq zaŋnamalyq küşıne enbegenın aitty.
Elşınıŋ sözınşe, Qazaqstanda bosqyndar lagerın aşu turaly aqparattar negızsız boljamdardan tuǧan.
«Europalyq odaq ta, Europalyq komissiia da qazırgı uaqytta eşbır memleketpen, sonyŋ ışınde Qazaqstanmen de, ony üşınşı el retınde paidalanu jönınde kelıssözder jürgızıp jatqan joq. Mūndai bastamalardy EO emes, müşe memleketterdıŋ özderı köteruı mümkın. Mysaly, İtaliia men Albaniia arasynda osyndai kelısım bar. Bolaşaqta qandai da bır el Qazaqstanǧa nemese Özbekstanǧa ūsynys jasauy mümkın, bıraq būl sol memlekettıŋ egemen şeşımı bolady. Qazırgı uaqytta Qazaqstanmen mūndai kelıssözder jürgızılgen joq jäne juyq arada josparlanyp otyrǧan joq», – dedı ol.
Aleşka Simkich Europalyq odaqtyŋ Qazaqstan aumaǧynda bosqyndarǧa arnalǧan lagerler salu mäselesın kün tärtıbıne şyǧarmaǧanyn taǧy bır märte atap öttı. Onyŋ aituynşa, mūndai şeşımder tek tiıstı memlekettıŋ kelısımımen ǧana qabyldanady jäne EO olardy bırjaqty türde jüzege asyra almaidy.
