ءدال قازىر الماتىداعى بوستاندىق اۋداندىق سوتىندا جۋرناليست گۇلنارا باجكەنوۆاعا قاتىستى سوت وتىرىسى ءوتىپ جاتىر. ايىپتاۋشى پروكۋروردان بۇرىن ءسوز العان ادۆوكات ولگا كيم سۋدياعا بىرنەشە ءوتىنىشحات جولدادى.
سوت وتىرىسىندا تاراپتاردىڭ بىرقاتار پروتسەسسۋالدىق مالىمدەمەلەرى كوپشىلىكتىڭ نازارىن اۋداردى. قورعاۋشىسىنىڭ ءوتىنىشحاتىن نەگىزدەۋ بارىسىندا باجكەنوۆا اقشا اۋدارىمدارىنا قاتىستى تۇسىنىكتەمە بەرىپ، قاراجاتتى زاڭسىز يەمدەنبەگەنىن ايتتى. ونىڭ سوزىنشە، اۋدارىلعان قاراجات قىزمەتكەرلەردىڭ ەڭبەكاقىسىن تولەۋگە جۇمسالعان.
سونداي-اق باجكەنوۆا قولما-قول اقشانى كەيىن بانك كارتاسىنا ءوزى ەنگىزىپ وتىرعانىن ايتتى.
«ەسكاد» جشس-ءنىڭ ادۆوكاتى ءوز كەزەگىندە باجكەنوۆا سوتتى جاڭىلىستىرىپ وتىر دەپ مالىمدەدى. ونىڭ ايتۋىنشا، سوتتالۋشىنىڭ ايتقانىنداي كومپانيانىڭ اتىنا ەشقانداي سوتقا دەيىنگى تالاپ-ارىز جولدانباعان. سوندىقتان ونىڭ بۇل مالىمدەمەسى شىندىققا سايكەس كەلمەيدى، دەدى قورعاۋشى.
بۇدان كەيىن جابىرلەنۋشىلەردىڭ ادۆوكاتتارى باجكەنوۆانىڭ ءوتىنىشحاتىنا جاۋاپ رەتىندە وزدەرىنىڭ بىرنەشە ءوتىنىشحاتىن ۇسىندى. ولار سوتتالۋشىنىڭ كەلتىرگەن ۋاجدەرىنە قارسىلىق ءبىلدىرىپ، ءىس ءۇشىن ماڭىزدى دەپ سانايتىن ءمان-جايلاردى سوتتىڭ نازارعا الۋىن سۇراعان.
وسىلايشا، العاشقى سوت وتىرىسى تاراپتاردىڭ بەلسەندى پروتسەسسۋالدىق تارتىسىمەن باستالدى. ەندى سوت بارلىق ۇسىنىلعان وتىنىشحاتتارعا قۇقىقتىق باعا بەرىپ، ءتيىستى شەشىم قابىلداۋى كەرەك.
ءىستى سۋديا ەلەنا كۆان قاراپ جاتىر. قازىر مەملەكەتتىك ايىپتاۋشى ايىپتاۋ اكتىسىن وقىپ جاتىر.
ايتا كەتەيىك، باجكەنوۆاعا قىلمىستىق كودەكستىڭ 189-بابى («سەنىپ تاپسىرىلعان بوتەننىڭ مۇلكىن ءىرى مولشەردە يەمدەنۋ نەمەسە ىسىراپ ەتۋ»), 214-بابى («زاڭسىز كاسىپكەرلىك») جانە 274-بابى («كورىنەۋ جالعان اقپارات تاراتۋ») بويىنشا ايىپ تاعىلعان. ول 2025 جىلعى 1 جەلتوقساننان بەرى ۇيقاماقتا وتىر.
