1 جەلتوقساندا Orda.kz باسىلىمىنىڭ كەڭسەسى مەن باس رەداكتوردىڭ ۇيىندە جۇرگىزىلگەن تىنتۋلەردەن كەيىن رەداكتسيا ءوز جۇمىسىن توقتاتپاي، قالىپتى رەجيمدە قىزمەتىن جالعاستىرىپ جاتىر. بۇل تۋرالى جۋرناليست يسلامبەك داستان باس رەداكتور گۇلنار باجكەنوۆانىڭ «جۇمىس ىستەيمىز. Orda.kz ءوز قىزمەتىن جالعاستىرادى» دەگەن سوزدەرىن كەلتىرىپ، ايتتى، دەپ حابارلايدى “ادىرنا”.
جامبىل وبلىسىنداعى Orda.kz ءتىلشىسىنىڭ مالىمەتىنشە، وڭىرلىك فيليالدىڭ شەف-رەداكتورى دميتري كيم جاۋاپ الۋ راسىمىنەن سوڭ بايلانىسقا شىققان. ال باس رەداكتور گۇلنار باجكەنوۆا ادۆوكاتىنىڭ قاتىسۋىمەن تەرگەۋ ارەكەتتەرىندە جۇرگەنى حابارلاندى.
رەداكتسيا وكىلدەرى تىنتۋلەردى باسىلىمعا عانا ەمەس، جالپى جۋرناليستيكاعا جاسالعان قىسىم رەتىندە باعالايتىنىن مالىمدەدى.
سونىمەن قاتار، ادۆوكات مارات ادام بۇعان دەيىن Orda.kz-تەگى 70% ۇلەسكە قاتىستى رەيدەرلىك ارەكەت بويىنشا قىلمىستىق ءىس 28 قاراشادا قوزعالعانىن ايتقان. ونىڭ سوزىنشە، تەرگەۋ شارالارى كەزىندە قۇقىق قورعاۋ ورگاندارى ونى قورعالۋشىسىنا جىبەرمەي، قورعاۋ قۇقىعىن بۇزعان.
وقيعاعا قاتىستى تەرگەۋ جۇمىستارى جابىق رەجيمدە جۇرگىزىلۋدە. رەداكتسيا بولسا، قانداي جاعدايعا قاراماستان اقپاراتتىق قىزمەتىن جالعاستىرا بەرەتىنىن اتاپ ءوتتى.
ەسكە سالساق، بۇگىن، 1 جەلتوقساندا Orda.kz باسىلىمى رەداكتسياسىندا جانە ونىڭ باس رەداكتورى گۇلنار باجكەنوۆانىڭ پاتەرىندە ءتىنتۋ جۇرگىزىلگەن بولاتىن.
باجكەنوۆاعا قاتىستى قىلمىستىق ىستەر "قاتە جانە ادەيى جالعان اقپارات تاراتۋ" فاكتىلەرى بويىنشا بىرنەشە ارىز تۇسۋىنە بايلانىستى قوزعالعان. تەرگەۋ دەرەكتەرىنە سۇيەنسەك، ارىزدانۋشىلاردىڭ ۋاجدەرى قازىر جان-جاقتى قارالىپ جاتىر.
