باتىس قازاقستان وبلىسى قازاقستاندا العاشقىلاردىڭ ءبىرى بولىپ مەملەكەتتىك ورگاندار، ازاماتتىق قوعام جانە تەحنولوگيالىق سەرىكتەستەر مەملەكەت باسشىسىنىڭ «زەردەلى ۇلت قالىپتاستىرۋ» تۋرالى جارلىعىن بىرلەسىپ ىسكە اسىرۋعا كوشكەن وڭىرلەردىڭ قاتارىنا ەندى.
1 شىلدە كۇنى باتىس قازاقستان وبلىسى اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى ىنتىماقتاستىق تۋرالى مەموراندۋمعا قول قويىپ، كىتاپ وقۋ مادەنيەتىن دامىتۋ جانە رەسپۋبليكالىق كىتاپ وقۋ مارافونىنا دايىندىقتى باستاۋعا باعىتتالعان ۇيىمداستىرۋشىلىق، ءبىلىم بەرۋ، قوعامدىق جانە تەحنولوگيالىق رەسۋرستاردى بىرىكتىردى.
مەموراندۋمعا قول قويۋ پرەزيدەنتتىك باستامانى وڭىرلىك دەڭگەيدە ناقتى ىسكە اسىرۋداعى ناقتى قادام بولدى. «كىتاپ وقيتىن ۇلت» جوباسى اياسىندا مەملەكەت، ازاماتتىق قوعام جانە تەحنولوگيالىق سەرىكتەستەر اراسىنداعى جۇيەلى ءوزارا ءىس-قيمىل جۇيەسى قالىپتاسۋدا. بۇل جۇيەنىڭماقساتى — كىتاپ وقۋ مادەنيەتىن تۇراقتى قوعامدىق داعدىعا اينالدىرۋ.
وسى جۇيەنىڭ ماڭىزدى ەلەمەنتتەرىنىڭ ءبىرى — تەحنولوگيالىق سەرىكتەس رەتىندە Yandex Qazaqstanكومپانياسىنىڭ «ياندەكس كىتاپتار» سەرۆيسىنىڭ قاتىسۋى. بۇل پلاتفورما كەڭ كولەمدى تسيفرلىق كىتاپحاناعا تەگىن قولجەتىمدىلىكتى قامتاماسىز ەتىپ، جاس ەرەكشەلىگىنە، تۇرعىلىقتى جەرىنە جانە ءداستۇرلى كىتاپ رەسۋرستارىنا قولجەتىمدىلىك دەڭگەيىنە قاراماستان حالىقتىڭ كىتاپ وقۋعا تارتىلۋ مۇمكىندىگىن كەڭەيتەدى. وسىلايشا تسيفرلىق تەحنولوگيالار «كىتاپ وقيتىن ۇلت» جوباسىنىڭ ماڭىزدى ينفراقۇرىلىمدىق بولىگىنە اينالۋدا.
2026 جىلى قازاقستان رەسپۋبليكاسىنىڭ پرەزيدەنتى «زەردەلى ۇلت قالىپتاستىرۋ تۋرالى» جارلىققا قول قويىپ، كىتاپ وقۋ مادەنيەتىن دامىتۋدى مەملەكەتتىك ساياساتتىڭ باسىم باعىتتارىنىڭ ءبىرى رەتىندە ايقىندادى. قۇجات كىتاپتى ناسيحاتتاۋ، وقۋ داعدىلارىن دامىتۋ جانە كىتاپ وقۋ كۇندەلىكتى ءومىردىڭ اجىراماس بولىگىنە اينالاتىن جاعداي قالىپتاستىرۋ بويىنشا ۇزاق مەرزىمدى جانە جۇيەلى جۇمىستى كوزدەيدى. باتىس قازاقستان وبلىسىندا مەموراندۋمعا قول قويىلۋى وسى ستراتەگيالىق مىندەتتى جۇزەگە اسىرۋداعى العاشقى پراكتيكالىق قادامداردىڭ ءبىرى بولدى.
«كىتاپ وقۋ مادەنيەتىن دامىتۋ — ەلىمىزدىڭ بولاشاعى ءۇشىن اسا ماڭىزدى ماسەلە. مەملەكەت باسشىسىنىڭ جارلىعى بۇل باعىتتاعى جۇمىستى بارلىق دەڭگەيدە جۇيەلى تۇردە جۇرگىزۋگە مۇمكىندىك بەردى. باتىس قازاقستان وبلىسى ءبىلىم بەرۋ، مادەنيەت، كىتاپحانا جۇيەسى جانە ازاماتتىق قوعام الەۋەتىن بىرىكتىرە وتىرىپ، وقۋدى ءار وتباسىنىڭ كۇندەلىكتى ءومىرىنىڭ اجىراماس بولىگىنە اينالدىرۋعا دايىن»، — دەدى باتىس قازاقستان وبلىسى اكىمىنىڭ ورىنباسارى قايرجان مەندىعاليەۆ.
«مەملەكەت باسشىسىنىڭ جارلىعى بۇل باعىتتاعى جۇمىستى بارلىق دەڭگەيدە جۇيەلى سيپاتقا يە ەتتى. ءبىز “كىتاپ وقيتىن ۇلت” جوباسىن مەملەكەت، ازاماتتىق قوعام جانە تەحنولوگيالىق كومپانيالار اراسىنداعى سەرىكتەستىك مودەلى رەتىندە قاراستىرامىز. Yandex Qazaqstan جانە “ياندەكس كىتاپتار” سەرۆيسىمەن ىنتىماقتاستىق جوبانىڭ تسيفرلىق قۇرامداس بولىگىن كۇشەيتىپ، وقىرماندار ءۇشىن كىتاپتارعا قولجەتىمدىلىكتى كەڭەيتەدى جانە جەڭىلدەتەدى.
ءبىزدىڭ ميسسيامىز — مەملەكەت، قوعام جانە زاماناۋي تەحنولوگيالاردى بىرىكتىرە وتىرىپ، كىتاپ وقۋدى قازاقستانداعى جاڭا قوعامدىق نورماعا اينالدىرۋ. وسىنداي ارىپتەستىك كىتاپ وقۋ مادەنيەتىن ادامداردىڭ كۇندەلىكتى ءومىرىنىڭ تابيعي بولىگىنە اينالدىرۋعا جانە ەلدىڭ زياتكەرلىك دامۋىنا بەرىك نەگىز قالىپتاستىرۋعا مۇمكىندىك بەرەدى»، — دەدى «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساقوشەۆ.
نەگىزگى باستامالاردىڭ ءبىرى — «كىتاپ وقيتىن ۇلت» رەسپۋبليكالىق كىتاپ وقۋ مارافونى. بۇل اۋقىمدى جوبا وقۋشىلاردى، ستۋدەنتتەردى، پەداگوگتاردى، اتا-انالاردى، اعا بۋىن وكىلدەرىن جانە كىتاپتى ءبىلىم مەن دامۋدىڭ كوزى رەتىندە قابىلدايتىن بارلىق ازاماتتاردى بىرىكتىرەدى.
الداعى ۋاقىتتا وڭىردە جوبانى ىسكە اسىرۋدىڭ دايىندىق كەزەڭى باستالادى. وڭىرلىك جوبالىق وفيس قۇرىلىپ، ءبىلىم بەرۋ جانە مادەنيەت ۇيىمدارىندا ۇيلەستىرۋشىلەر تاعايىندالادى، قاتىسۋشىلاردى تىركەۋ جانە وقىلعان كىتاپتاردى ەسەپكە الۋ ءۇشىن تسيفرلىق پلاتفورما ىسكە قوسىلادى. اۋىلدىق جانە شالعاي ەلدى مەكەن تۇرعىندارىن قامتۋعا ەرەكشە نازار اۋدارىلادى.
«كىتاپ وقيتىن ۇلت – چيتايۋششايا ناتسيا» قوعامدىق قورى قازاقستاندا تۇراقتى كىتاپ وقۋ مادەنيەتىن قالىپتاستىرۋعا جانە كىتاپتى ىلگەرىلەتۋگە باعىتتالعان جالپىۇلتتىق باستامالاردى ىسكە اسىرۋ ءۇشىن قۇرىلعان. قول قويىلعان مەموراندۋم قور مەن باتىس قازاقستان وبلىسى اكىمدىگى اراسىنداعى «كىتاپ وقيتىن ۇلت» جوباسىن جۇزەگە اسىرۋداعى ۇزاق مەرزىمدى ارىپتەستىكتى بەكىتەدى.
