سوت Air Astana اۋە كومپانياسىن 12 جاستاعى قىزدى ۇشاققا وتىرعىزباعانى ءۇشىن ونىڭ اناسىنا 5 ملن تەڭگە كولەمىندە مورالدىق وتەماقى تولەۋگە مىندەتتەدى، دەپ حابارلايدى “ادىرنا” ۇلتتىق پورتالى.
«سوت Air Astana-نى زەرەنىڭ اناسىنا 5 ميلليون كولەمىندە مورالدىق وتەماقى تولەۋگە مىندەتتەدى. ءبىز جەڭدىك. بالانىڭ اناسى ەكەۋمىز ورىن العان ارتىق تاپسىرىستى دالەلدەۋ ءۇشىن ۇزاق جول جۇردىك. باستاپقىدا بۇل ءىس قوعامدا رەزونانس تۋدىرمايىنشا، ءبىزدىڭ شاعىمىمىزعا ءمان بەرىلگەن جوق»، - دەدى ادۆوكات دانيلحان شاعاتاەۆ ءوزىنىڭ Telegram-ارناسىندا.
20 شىلدەدە زەرە جانە زاۋرە اتتى ەگىز قىز امەريكادان ەلگە قايتقان. ولار سەنىمدى وكىلمەن، ءبىر توپ بالامەن ساياحاتتاعان. قايتاردا استانا ارقىلى ترانزيتپەن ورالعا ۇشۋى كەرەك بولعان، بىراق زەرەنى كومپانيا بورتقا كىرگىزبەي، جالعىز ءوزىن تاستاپ كەتكەن. سونىڭ سالدارىنان ەگىزدىڭ سىڭارى استانا اۋەجايىندا جالعىز قالىپ قويعان. ال سەنىمدى وكىل باسقا بالالارمەن ۇشىپ كەتكەن.
اۋەجايداعى بەينەباقىلاۋ كامەرالارىنىڭ جازبالارىنان 12 جاستاعى قىزدىڭ 3 ساعات جىلاپ تۇرعانىن كورۋگە بولادى.
وسى وقيعادان كەيىن FlyArystan باسشىسى بالانىڭ اناسىمەن كەزدەسىپ، كەشىرىم سۇراپ، وتەماقى رەتىندە 4 ميلليون تەڭگە ۇسىنعان. بىراق ايەل ودان باس تارتىپ، سوتقا جۇگىنگەن.
FlyArystan اۋە كومپانياسى سىيىمدىلىعى 188 ورىندىق ۇشاقتى 180 ورىندىق بورتقا اۋىستىرعانى انىقتالدى. ناتيجەسىندە زەرە 181-جولاۋشى رەتىندە تىركەلىپ، ۇشاققا وتىرا الماعان. 19 جانە 20 كۇنى ۇشۋى كەرەك رەيس جولاۋشىلارى دا وسى بورتقا وتىرعىزىلعان. ناتيجەسىندە كامەلەتكە تولماعان جولاۋشى اۋەجايدا قالىپ قالعان.
اۋە كومپانياسى بالانى قالا ىشىندەگى قوناقۇيگە ورنالاستىرۋدى ۇسىنعان. الايدا اناسى بالانىڭ جالعىز ءوزى قوناق ۇيگە بارۋىنا قارسى بولىپتى. ويتكەنى بالا زاڭدى وكىلدەرىنسىز تىركەلە المايدى. ارتىنشا اناسىنىڭ ءوتىنىشى بويىنشا، اۋەجايعا بالانىڭ تۋىسى كەلگەن. پوليتسيا قىزمەتكەرى مەن تۋىسىنىڭ مالىمەتىنشە، اۋە كومپانيا وكىلدەرى بالانىڭ تۋىسى جولاۋشى بولماعاندىقتان قوناقۇي بەرۋدەن باس تارتقان. سوتتا اۋە كومپانيا وكىلدەرى قوناقۇيمەن كەلىسىم بويىنشا تەك جولاۋشىلار عانا تەگىن قالا الاتىنىن مالىمدەدى.
ەسكە سالايىق، بۇعان دەيىن FlyArystan اۋەكومپانياسى 12 جاسار قىزدى رەيسكە مىنگىزبەي، جالعىز ءوزىن وزگە قالادا قالدىرىپ كەتكەنى حابارلانعان. وقيعادان كەيىن قىزدىڭ اناسى اۋەكومپانيانىڭ قىزمەتىنە نارازىلىق بىلدىرگەن بولاتىن.
