ءماجىلىس دەپۋتاتى رينات زايىت پارلامەنتتەگى ءۇش جىلدىق قىزمەتىنىڭ اياقتالعانىن ايتىپ، وسى ۋاقىت ىشىندە اتقارىلعان جۇمىستاردىڭ قورىتىندىسىن جاريالادى، دەپ حابارلايدى «ادىرنا» ءتىلشىسى.
ول دەپۋتاتتىققا كەلۋدەگى باستى ماقساتى حالىق مۇددەسىن قورعاۋ جانە ەلگە پايدالى قىزمەت اتقارۋ بولعانىن جەتكىزدى.
ء«اۋ باستان مانداتقا ۇمتىلعانىمنىڭ ەكى سەبەبى بولدى. ءبىرىنشىسى – 2019 جىلى كوپشىلىكتىڭ الدىندا ەلدىڭ مۇددەسىن جان سالىپ قورعاۋعا ۋادە ەتكەنىم، ەكىنشىسى- مۇمكىندىگى بار جەردەن حالىقتىڭ پايداسىنا جارايتىن قىزمەت اتقارعىم كەلگەنى. شۇكىر. تولىقتاي دەمەسەم دە، ەكى بىردەي تىلەگىم دە ورىندالادى.
ماجىلىستە جۇرگەن ءۇش جىلدىڭ ءبىر كۇنىن دە جەكە پايداما نەمەسە قالتامنىڭ قامى ءۇشىن جۇمساماعانىمدى كوزدەرىڭىزگە تىك قاراپ، ماقتانىشپەن ايتا الامىن. قانداي جينالىس، قاي وتىرىس بولماسىن حالىقتىڭ مۇددەسىن ساۋداعا سالعان جوقپىن. دەپۋتات بولۋىما تىكەلەي قولداۋ كورسەتكەن AMANAT پارتياسى مەن توراعا ەرلان جاقانۇلى قوشانوۆتىڭ دەمەۋىنىڭ ارقاسىندا اۋىز تولتىرىپ ايتا الاتىنداي جۇمىس جاسادىم»،–دەدى ول.
رينات زايىت مادەنيەت قىزمەتكەرلەرىنىڭ جالاقىسىن كوتەرۋ، ۇبت جۇيەسىن مەملەكەتكە قايتارۋ، سەمەيدەگى ساياجاي ماسەلەسىن شەشۋ، ونلاين الاياقتىق قۇرباندارىن قورعاۋ، زاڭسىز شىعارىلعان اكتيۆتەردى قايتارۋ، ءمامس جۇيەسىن جەتىلدىرۋ، مەملەكەتتىك ءتىلدىڭ اقپاراتتىق كەڭىستىكتەگى ۇلەسىن ارتتىرۋ جانە شەتەلدىكتەرگە سۋرروگات انا قىزمەتىن پايدالانۋعا تىيىم سالۋ سياقتى باستامالاردا ءوز ۇلەسى بولعانىن اتاپ ءوتتى.
ء«يا، كەيدە قالاعان ماقساتقا قول جەتكىزە الماي «بارماق شايناعان» كەزدەرىم دە از بولعان جوق. ول وزىممەن مۇددەلەس ادامداردىڭ ازدىعىنان دەپ تۇسىنەرسىزدەر. ءماجىلىس – جەكە باتىرلىق جاسايتىن جەر ەمەس. اتقارعان جۇمىستارىم جايلى تولىق، اشىق اقپاردى الداعى ۋاقىتتا كەڭىنەن جاريالايمىن، بۇيىرسا»،– دەدى دەپۋتات.
ەسكە سالايىق، 29 ماۋسىم كۇنى قازاقستان تاريحىنداعى سەناتتىڭ سوڭعى وتىرىس وتكەن ەدى.
