دەپۋتات ەربول ايتۋوۆ قايتىس بولعاننان كەيىن «قاسيەت» كلينيكاسى رەسمي مالىمدەمە جاسادى، دەپ حابارلايدى "ادىرنا" ۇلتتىق پورتالى.
كلينيكانىڭ باس دارىگەرى ارتۋر تاجيەۆ الەۋمەتتىك جەلىلەردە تاراعان اقپاراتتارعا تۇسىنىكتەمە بەرىپ، ايىپ تاعىلىپ وتىرعان دارىگەردىڭ اتالعان وپەراتسيانى جاساماعانىن مالىمدەدى.
«الەۋمەتتىك جەلىلەردە تاراپ جاتقان جالعان ءارى قاراما-قايشى اقپاراتتارعا بايلانىستى مالىمدەيمىز: ايىپ تاعىلىپ وتىرعان دارىگەر جاريالانىمداردا ايتىلعان وپەراتسيانى جۇرگىزگەن جوق»، – دەدى ول.
سونىمەن قاتار كلينيكا باسشىلىعى مەديتسينالىق مەكەمەنىڭ ليتسەنزياسى جوق دەگەن اقپاراتتى دا جوققا شىعاردى.
مالىمدەمەگە سايكەس، «قاسيەت» كلينيكاسى 2015 جىلعى 31 شىلدەدە بەرىلگەن №00650DE ليتسەنزياسى نەگىزىندە قىزمەت كورسەتەدى. ونىڭ ىشىندە انەستەزيولوگيا جانە رەانيماتولوگيا قىزمەتتەرىنە دە رۇقساتى بار ەكەنى ايتىلدى. باس دارىگەر بۇقارالىق اقپارات قۇرالدارى مەن الەۋمەتتىك جەلى قولدانۋشىلارىن تەكسەرىلمەگەن مالىمەتتەردى تاراتپاۋعا شاقىردى.
ەسكە سالساق، ەربول ايتۋوۆ 4 ءساۋىر كۇنى ليپوساكتسيا جاساۋ ءۇشىن جەكە كلينيكاعا جۇگىنگەن. وپەراتسيادان كەيىن ونىڭ جاعدايى كۇرت ناشارلاپ، كوماعا تۇسكەن. مارقۇمنىڭ جۇبايى لاۋرا ايتۋوۆاتىڭ ايتۋىنشا، انەستەزيادان كەيىن ەربول ايتۋوۆتىڭ قان قىسىمى مەن قان قۇرامىنداعى قانت دەڭگەيى كۇرت كوتەرىلگەن. كەيىن ول وبلىستىق اۋرۋحاناعا جەتكىزىلگەنىمەن، ەسىن جيماستان ءبىر ايدان سوڭ كوز جۇمعان.
