Äleumettık jelılerde Qazaqstannyŋ tūŋǧyş prezidentınıŋ ülken qyzy Dariǧa Nazarbaevamen bailanystyrylatyn Londondaǧy zäulım üidıŋ suretterı jariialandy, dep habarlaidy "Adyrna" ūlttyq portaly Ūlysmediaǧa sıltep.
BAQ mälımetınşe, bırneşe jyldan berı satylymda tūrǧan jyljymaityn mülıkke älı künge deiın satyp aluşy tabylmaǧan.
Mälımetke säikes, zäulım üi Londonnyŋ bedeldı audandarynyŋ bırı – Highgate golf-klubynyŋ maŋyndaǧy Denewood Road köşesınde ornalasqan. Nysan alǧaş ret 2022 jyldyŋ nauryz aiynda, Qazaqstandaǧy Qaŋtar oqiǧasynan keiın satylymǧa şyǧarylǧan. Sol kezde üidıŋ baǧasy 11,8 million AQŞ dollary bolsa, qazır ol 10,5 million dollarǧa deiın tömendetılgen. Jalpy aumaǧy şamamen 765 şarşy metrdı qūraityn üide jetı jatyn bölme, alty juynu bölmesı, bırneşe qonaq bölmesı, bassein, biliard zaly jäne qysqy baq bar.
Jariialanǧan fotosuretter äleumettık jelı qoldanuşylarynyŋ nazaryn erekşe audardy. Köpşılık sändı interermen qatar, üi ışındegı qazaqy kılemder men körpeşelerdı qyzu talqylap jatyr.
Aita keteiık, būl jyljymaityn mülıktıŋ tüpkı iesı retınde Dariǧa Nazarbaevanyŋ esımı 2020 jyly atalǧan. Sol kezde Ūlybritaniianyŋ Qylmyspen küres jönındegı ūlttyq agenttıgı atalǧan üi men taǧy ekı nysanǧa qatysty satyp alu qarajatynyŋ şyǧu tegın tüsındırudı talap etıp, olardy būǧattauǧa äreket jasaǧan. Alaida keiın London soty būl mülıkterge salynǧan şekteudı alyp tastady.
