قازاقستاندىق كاسىپكەر، تەلەجۇرگىزۋشى دينارا ءساتجاننىڭ جۇبايى جۇمابەك جانىقۇلوۆ الەۋمەتتىك جەلىدە بۇرىنعى جۇبايى جاننا جانىقۇلوۆانىڭ سوزىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
كاسىپكەردىڭ ايتۋىنشا، تۋىنداعان داۋلار الەۋمەتتىك جەلىدە ەمەس، زاڭ اياسىندا سوت ارقىلى شەشىلۋى ءتيىس.
ء«بىز قۇقىقتىق مەملەكەتتە ءومىر ءسۇرىپ جاتىرمىز. سوندىقتان بارلىق داۋلى ماسەلەلەردى الەۋمەتتىك جەلىلەردە ەمەس، سوت تارتىبىمەن شەشۋىمىز كەرەك»، – دەپ جازدى جانىقۇلوۆ Facebook پاراقشاسىندا.
ونىڭ سوزىنشە، بۇرىنعى جۇبايى ءۇش جىلدان استام ۋاقىت بۇرىن جاسالعان نەكە شارتى مەن اليمەنت تولەۋ تۋرالى كەلىسىمدەردى سوت ارقىلى جارامسىز دەپ تانۋدى تالاپ ەتىپ وتىر.
كاسىپكەر بۇل قۇجاتتارعا قول قويۋ كەزىندە بۇرىنعى جۇبايىنىڭ تاجىريبەلى زاڭگەرلەردىڭ كومەگىنە جۇگىنگەنىن جانە سول كەزدە تاراپتاردىڭ ورتاق كەلىسىمگە كەلگەنىن اتاپ ءوتتى. سونىمەن قاتار جۇمابەك جانىقۇلوۆ اجىراسقاننان كەيىن كەلىسىمدە كورسەتىلگەن بارلىق قارجىلىق جانە وزگە دە مىندەتتەمەلەرىن ورىنداپ كەلە جاتقانىن مالىمدەدى.
«بالالارىممەن قارىم-قاتىناسىم وتە جاقسى. ولاردى ءاردايىم قولداپ كەلەمىن جانە قولداي بەرەمىن»، – دەدى ول.
كاسىپكەر بۇرىنعى جۇبايىمەن اراداعى كەلىسىمدەردىڭ مازمۇنى قۇپيا ەكەنىن، سوندىقتان وسى ۋاقىتقا دەيىن ولاردىڭ شارتتارىن جاريا ەتپەگەنىن ايتتى. دەگەنمەن، قاجەت بولعان جاعدايدا كەلىسىمدەردىڭ جاريالانۋىنا قارسى ەمەس ەكەنىن جەتكىزدى.
بۇعان دەيىن جاننا جانىقۇلوۆا الماتى قالاسىنىڭ يۋۆەنالدى سوتىندا نەكە شارتى مەن اليمەنت تولەۋ تۋرالى كەلىسىمدى جارامسىز دەپ تانۋ تۋرالى ءىس قارالىپ جاتقانىن حابارلاعان. ونىڭ ايتۋىنشا، اجىراسۋعا بۇرىنعى جۇبايىنىڭ وپاسىزدىعى سەبەپ بولعان. سونداي-اق ول سوتتان كاسىپكەردىڭ تابىسىنا قاتىستى مالىمەتتەردى سۇراتۋ جونىندەگى وتىنىشتەرى قاناعاتتاندىرىلماعانىن ايتقان.
