بۇگىن «قۇزىرەتتىلىك ورتالىعىندا» وبلىس اكىمى مۇرات ەرگەشباەۆتىڭ، ءماسليحات دەپۋتاتتارى، جەرگىلىكتى بيزنەس وكىلدەرى، دامۋ جانە قارجى ينستيتۋتتارى باسشىلارىنىڭ قاتىسۋىمەن «قازاقستاننىڭ ۇزدىك تاۋارى – 2026» وڭىرلىك كورمە-بايقاۋى ءوتتى.
ايماق كاسىپكەرلەرى مەن تاۋاروندىرۋشىلەرى جىل سايىنعى «التىن ساپا» سىيلىعى مەن «قازاقستاننىڭ ۇزدىك تاۋارى» ءداستۇرلى رەسپۋبليكالىق كورمە-بايقاۋىنا بەلسەندى قاتىسىپ كەلەدى. بۇل – وتاندىق تاۋاروندىرۋشىلەردى قولداۋعا، ءونىم ساپاسىن ارتتىرۋعا جانە ۇلتتىق برەندتەردى دامىتۋعا باعىتتالعان ماڭىزدى شارا.
ايماق باسشىسى باسەكەگە قابىلەتتى ءونىم شىعارىپ، ساپالى قىزمەت كورسەتۋ ەلىمىزدىڭ وركەندەۋىنە ناقتى ىسپەن ۇلەس قوسۋ ەكەنىن اتاپ ءوتتى.
– بۇل مىندەتتى جۇزەگە اسىرۋدا كاسىپكەرلەر قاۋىمىنىڭ ەڭبەگى مەن جاۋاپكەرشىلىگى ەرەكشە. كورمەنى ارالاۋ بارىسىندا ساپالى ونىمدەردى وزىمىزدە شىعارۋعا بولاتىنىن كوردىك.
پرەزيدەنتىمىز قاسىم-جومارت كەمەلۇلى: «قازاقستاندا جاسالعان» دەگەن تاڭبا ەڭ مىقتى ساپانىڭ، ەڭ جاقسى ءونىمنىڭ بەلگىسىنە اينالۋعا ءتيىس. «التىن ساپا» بايقاۋىنىڭ باستى ماقساتى – وسى» دەپ اتاپ وتكەن بولاتىن.
وبلىس ەكونوميكاسىن ءارتاراپتاندىرۋدا جوعارى ساپالى، ەكسپورتقا باعىتتالعان وڭدەۋ ونەركاسىبى قارقىن الدى. الداعى 3 جىلدا 48 ينۆەستيتسيالىق جوبانى جۇزەگە اسىرىپ، 10 مىڭنان استام جاڭا جۇمىس ورنىن قۇرۋ كوزدەلگەن.
بۇگىنگى كورمە-بايقاۋ الاڭى – كاسىپكەرلەر اراسىنداعى ءوزارا ىنتىماقتاستىقتى كۇشەيتىپ، جەرگىلىكتى ونىمدەردى تۇتىنۋ مەن وتكىزۋدى ارتتىرۋعا مۇمكىندىك بەرەدى»،– دەدى مۇرات نالقوجاۇلى.
جاقىندا «مارال نۇر» سەرىكتەستىگىنىڭ جوعارى تەحنولوگيالىق ۆاگونداردى جوندەۋ جانە تەحنيكالىق قىزمەت كورسەتۋ كەشەنى اشىلدى. بۇل كومپانيا تەمىرجول ينفراقۇرىلىمىن دامىتۋداعى ساپالى جۇمىسى ءۇشىن وتكەن جىلى «التىن ساپا» سىيلىعىنىڭ لاۋرەاتى اتاندى.
وتكەن ايدا يسپاندىق «روكا گرۋپ» كومپانياسىنىڭ سانيتارلىق-تەحنيكالىق بۇيىمدار، «سەۆەن ريۆەرس» كومپانياسىنىڭ شىنى ىدىستار شىعاراتىن زاۋىتتارىنىڭ كاپسۋلاسى سالىندى. الداعى ۋاقىتتا جاڭا وندىرىستەردىڭ جوعارى ساپالى ءونىمى وبلىس ەكونوميكاسىن وركەندەتۋگە سەپتىگىن تيگىزەدى.
بيىلعى كورمە-بايقاۋعا ەكونوميكانىڭ ءتۇرلى سالالارىنان 62 ءتاۋاروندىرۋشى قاتىستى. ساراپشىلاردىڭ باعالاۋ قورىتىندىسى بويىنشا «وندىرىستىك ماقساتتاعى ۇزدىك تاۋارلار»، «ۇزدىك ازىق-تۇلىك تاۋارلارى» جانە «حالىققا ارنالعان ۇزدىك تاۋارلار» نوميناتسيالارى بويىنشا 9 جەڭىمپاز ماراپاتتالدى.
قازىر قىزىلوردا وبلىسىندا 60 مىڭعا جۋىق شاعىن جانە ورتا كاسىپكەرلىك سۋبەكتىسى جۇمىس ىستەيدى. بۇل سەكتوردا 113 مىڭنان استام ادام ەڭبەكپەن قامتىلعان. بيىل كاسىپكەرلىكتى قولداۋعا شامامەن 25 ملرد تەڭگە ءبولىنىپ، 553 جوبا قارجىلاندىرىلدى.
