"مەديازونا" باسىلىمى جانە ەرىكتىلەر توبى جۇرگىزگەن بىرلەسكەن زەرتتەۋ ناتيجەسىندە ۋكرايناداعى سوعىس باستالعالى قازا تاپقان 229 254 رەسەيلىك اسكەري قىزمەتشىنىڭ اتى-ءجونى انىقتالعان، دەپ حابارلايدى "ادىرنا" ۆۆس-گە سىلتەپ.
زەرتتەۋ اۆتورلارى بۇل ءتىزىم تەك اشىق دەرەككوزدەرگە نەگىزدەلگەنىن، سوندىقتان سوعىستا قازا تاپقانداردىڭ ناقتى سانى بۇدان دا كوپ بولۋى مۇمكىن ەكەنىن اتاپ ءوتتى. جينالعان مالىمەتتەرگە سايكەس، قازا تاپقانداردىڭ 56 پايىزى سوعىس باستالعاننان كەيىن عانا رەسەي قورعانىس مينيسترلىگىمەن كەلىسىمشارتقا وتىرعان جانە بۇعان دەيىن ازاماتتىق سالادا ەڭبەك ەتكەن ادامدار بولعان.
زەرتتەۋ بارىسىندا سوڭعى ءبىر جىلدا اسكەر قاتارىنا ءوز ەركىمەن قوسىلعانداردىڭ اراسىندا ءىرى كولەمدەگى قارىزى بار نەمەسە قىلمىستىق قۋدالاۋدان جالتارۋعا تىرىسقان ازاماتتاردىڭ ۇلەسى ارتقانى بايقالعان.
اۆتورلار مىسال رەتىندە كومي رەسپۋبليكاسىنىڭ تۇرعىنى سەرگەي ماحوتكيندى كەلتىرەدى. بۇعان دەيىن بىرنەشە رەت سوتتالعان ول جالعان ەۋرو كۋپيۋرالارىن وتكىزبەك بولدى دەگەن ايىپتان كەيىن سوتتان قۇتىلۋ ءۇشىن اسكەري كەلىسىمشارتقا قول قويعان. كەيىن ونىڭ مايداندا قازا تاپقانى حابارلانعان.
سونداي-اق زەرتتەۋدە كىسى ولتىرگەنى ءۇشىن سوتتالعان يگور سيۆولودسكيدىڭ دە اسكەري قىزمەتكە ەكى مارتە كەلىسىمشارت ارقىلى اتتانعانى ايتىلعان. ول العاشىندا جەكە اسكەري كومپانيا قۇرامىندا سوعىسقا قاتىسىپ، كەيىن تاعى ءبىر قىلمىستىق ءىس بويىنشا تەرگەۋ ءجۇرىپ جاتقان كەزدە قايتادان كەلىسىمشارت جاساپ، مايدانعا كەتكەن. كەيىن ونىڭ قازا تاپقانى بەلگىلى بولعان.
ماتەريالدا 2024 جىلدان باستاپ رەسەيدە قىلمىستىق ىستەر بويىنشا كۇدىكتىلەر مەن ايىپتالۋشىلارعا قورعانىس مينيسترلىگىمەن كەلىسىمشارت جاساسقان جاعدايدا سوتتان جالتارۋعا مۇمكىندىك بەرەتىن قۇقىقتىق تەتىك ەنگىزىلگەنى كورسەتىلگەن. زەرتتەۋ اۆتورلارى مۇنداي تاجىريبە ارميا قاتارىن تولىقتىرۋدىڭ ماڭىزدى قۇرالدارىنىڭ بىرىنە اينالعانىن ايتادى.
سونىمەن قاتار تالداۋ ناتيجەسى بويىنشا، سوڭعى ۋاقىتتا قازا تاپقاندار اراسىندا تۇزەۋ مەكەمەلەرىنەن اسكەرگە الىنعانداردىڭ ۇلەسى ازايىپ، ازاماتتىق ومىردەن ءوز ەركىمەن كەلىسىمشارتقا وتىرعانداردىڭ ۇلەسى ءوسىپ كەلەدى.
