"Mediazona" basylymy jäne erıktıler toby jürgızgen bırlesken zertteu nätijesınde Ukrainadaǧy soǧys bastalǧaly qaza tapqan 229 254 reseilık äskeri qyzmetşınıŋ aty-jönı anyqtalǧan, dep habarlaidy "Adyrna" VVS-ge sıltep.
Zertteu avtorlary būl tızım tek aşyq derekközderge negızdelgenın, sondyqtan soǧysta qaza tapqandardyŋ naqty sany būdan da köp boluy mümkın ekenın atap öttı. Jinalǧan mälımetterge säikes, qaza tapqandardyŋ 56 paiyzy soǧys bastalǧannan keiın ǧana Resei qorǧanys ministrlıgımen kelısımşartqa otyrǧan jäne būǧan deiın azamattyq salada eŋbek etken adamdar bolǧan.
Zertteu barysynda soŋǧy bır jylda äsker qataryna öz erkımen qosylǧandardyŋ arasynda ırı kölemdegı qaryzy bar nemese qylmystyq qudalaudan jaltaruǧa tyrysqan azamattardyŋ ülesı artqany baiqalǧan.
Avtorlar mysal retınde Komi Respublikasynyŋ tūrǧyny Sergei Mahotkindı keltıredı. Būǧan deiın bırneşe ret sottalǧan ol jalǧan euro kupiuralaryn ötkızbek boldy degen aiyptan keiın sottan qūtylu üşın äskeri kelısımşartqa qol qoiǧan. Keiın onyŋ maidanda qaza tapqany habarlanǧan.
Sondai-aq zertteude kısı öltırgenı üşın sottalǧan İgor Sivolodskiidıŋ de äskeri qyzmetke ekı märte kelısımşart arqyly attanǧany aitylǧan. Ol alǧaşynda jeke äskeri kompaniia qūramynda soǧysqa qatysyp, keiın taǧy bır qylmystyq ıs boiynşa tergeu jürıp jatqan kezde qaitadan kelısımşart jasap, maidanǧa ketken. Keiın onyŋ qaza tapqany belgılı bolǧan.
Materialda 2024 jyldan bastap Reseide qylmystyq ıster boiynşa küdıktıler men aiyptaluşylarǧa Qorǧanys ministrlıgımen kelısımşart jasasqan jaǧdaida sottan jaltaruǧa mümkındık beretın qūqyqtyq tetık engızılgenı körsetılgen. Zertteu avtorlary mūndai täjıribe armiia qataryn tolyqtyrudyŋ maŋyzdy qūraldarynyŋ bırıne ainalǧanyn aitady.
Sonymen qatar taldau nätijesı boiynşa, soŋǧy uaqytta qaza tapqandar arasynda tüzeu mekemelerınen äskerge alynǧandardyŋ ülesı azaiyp, azamattyq ömırden öz erkımen kelısımşartqa otyrǧandardyŋ ülesı ösıp keledı.
