فوتو: Anadolu agency
بيىل ازەربايجان قارۋلى كۇشتەرىنىڭ قۇرىلعانىنا 108 جىل تولىپ وتىر. Cوعان وراي بريۋسسەلدەگى ناتو شتاب-پاتەرىندە رەسمي قابىلداۋ ءوتتى. ءىس-شاراعا ناتو باس حاتشىسىنىڭ كاۆكاز جانە ورتالىق ازيا بويىنشا ارنايى وكىلى كەۆين گاميلتون، اليانسقا مۇشە جانە سەرىكتەس ەلدەردىڭ ەلشىلەرى مەن اسكەري وكىلدەرى، حالىقارالىق حاتشىلىق قىزمەتكەرلەرى جانە باسقا دا جوعارى لاۋازىمدى قوناقتار قاتىستى، دەپ حابارلايدى "ادىرنا".
قابىلداۋدا ءسوز سويلەگەن ازەربايجاننىڭ ناتو جانىنداعى ميسسياسىنىڭ باسشىسى دجافار گۋسەينزادە قارۋلى كۇشتەر كۇنى ەلدىڭ تاۋەلسىزدىگى، ەگەمەندىگى مەن مەملەكەتتىلىگىنىڭ ماڭىزىن تاعى ءبىر مارتە ايقىندايتىن مەرەكە ەكەنىن اتاپ ءوتتى. ونىڭ ايتۋىنشا، تاۋەلسىزدىكتى ساقتاۋ ءۇشىن مىقتى مەملەكەتتىك ينستيتۋتتار، ۇلتتىق بىرلىك جانە كاسىبي ارميا قاجەت.
ول قازىرگى ازەربايجان ارمياسىنىڭ نەگىزى 1918 جىلعى 26 ماۋسىمدا قالانعانىن ەسكە سالدى. سول كۇنى ازەربايجان دەموكراتيالىق رەسپۋبليكاسىنىڭ مينيسترلەر كەڭەسىنىڭ شەشىمىمەن العاشقى تۇراقتى اسكەري قۇرىلىم – جەكە كورپۋس قۇرىلعان بولاتىن. كەيىن تاۋەلسىزدىك قالپىنا كەلگەننەن كەيىن ەلدە كاسىبي ارميا قالىپتاستىرۋ باعىتىندا اۋقىمدى رەفورمالار جۇرگىزىلدى.
گۋسەينزادەنىڭ ايتۋىنشا، جالپىۇلتتىق كوشباسشى گەيدار اليەۆ باستاعان اسكەري قۇرىلىس ساياساتىن پرەزيدەنت ءارى جوعارعى باس قولباسشى يلحام اليەۆ جالعاستىرىپ، سونىڭ ناتيجەسىندە ازەربايجان ءوز ەگەمەندىگى مەن اۋماقتىق تۇتاستىعىن قالپىنا كەلتىردى.
ول سونداي-اق ازەربايجاننىڭ ماقساتى تەك اۋماقتىق تۇتاستىقتى قامتاماسىز ەتۋمەن شەكتەلمەيتىنىن ايتىپ، وڭتۇستىك كاۆكازدا تۇراقتى بەيبىتشىلىك ورناتۋعا ۇمتىلىپ وتىرعانىن جەتكىزدى. ونىڭ سوزىنشە، ۆاشينگتون سامميتىندە ازەربايجان مەن ارمەنيا اراسىنداعى بەيبىتشىلىك ۇدەرىسىندە قول جەتكىزىلگەن ىلگەرىلەۋ ماڭىزدى كەزەڭ بولعان.
ءىس-شارا بارىسىندا ازەربايجان مەن ناتو اراسىنداعى 30 جىلدان استام ۋاقىتقا سوزىلعان سەرىكتەستىككە دە ەرەكشە نازار اۋدارىلدى. ەلدىڭ كوسوۆو مەن اۋعانستانداعى ناتو ميسسيالارىنا قاتىسقانى، سونداي-اق ەۋروپا مەن ورتالىق ازيا اراسىنداعى ەنەرگەتيكالىق جانە كولىك بايلانىسىن دامىتۋعا قوسقان ۇلەسى اتالىپ ءوتتى.
ناتو باس حاتشىسىنىڭ كاۆكاز جانە ورتالىق ازيا بويىنشا ارنايى وكىلى كەۆين گاميلتون ازەربايجاندى اليانستىڭ سەنىمدى ءارى قۇندى سەرىكتەسى دەپ باعالادى.
«ازەربايجان مەن ناتو اراسىنداعى ۇزاقمەرزىمدى سەرىكتەستىك ەلدىڭ قارۋلى كۇشتەرىنىڭ كاسىبيلىگىن ارتتىرىپ، ولاردى جاڭعىرتۋعا ەلەۋلى ۇلەس قوستى. بۇگىندە ازەربايجان ارمياسى ناتو ستاندارتتارىمەن جوعارى دەڭگەيدە ۇيلەسىمدى ەكەنىن كورسەتىپ وتىر»، – دەدى ول.
گاميلتون سونداي-اق ازەربايجاننىڭ اۋعانستانداعى ناتو ميسسياسىنا قوسقان ۇلەسىن جوعارى باعالاپ، ەلدىڭ اليانس كۇشتەرىمەن بىرگە اۋعانستاننان شىققان سوڭعى سەرىكتەس مەملەكەت بولعانىن اتاپ ءوتتى.
قابىلداۋ اياسىندا ازەربايجان مەن ناتو اراسىنداعى ىنتىماقتاستىققا، گەيدار اليەۆتىڭ اليانسپەن بايلانىستاردى دامىتۋداعى رولىنە جانە پرەزيدەنت يلحام اليەۆتىڭ ناتو شتاب-پاتەرىنە جاساعان ساپارلارىنا ارنالعان فوتوكورمە ۇيىمداستىرىلدى. قوناقتارعا ازەربايجاننىڭ ۇلتتىق تاعامدارى ۇسىنىلدى.
ازەربايجاندا قارۋلى كۇشتەر كۇنى جىل سايىن 26 ماۋسىمدا اتالىپ وتەدى. بيىل ەلدە بۇل مەرەكە ارميانىڭ قۇرىلعانىنا 108 جىل تولۋىمەن تۇسپا-تۇس كەلدى. ازەربايجان بيلىگى سوڭعى جىلدارى جۇرگىزىلگەن اسكەري رەفورمالار ەلدىڭ قورعانىس قابىلەتىن كۇشەيتىپ، قارۋلى كۇشتەردىڭ كاسىبيلىگىن ارتتىرۋعا مۇمكىندىك بەرگەنىن اتاپ وتەدى.
