فوتو: جي كومەگىمەن
قازاقستان ءۇشىنشى ەلدەردەن، ەڭ الدىمەن قىتايدان اكەلىنەتىن جانار-جاعارماي ماتەريالدارىنا (ججم) سالىناتىن يمپورتتىق كەدەندىك باج سالاعىن نولگە دەيىن تومەندەتۋدى جوسپارلاپ وتىر. بۇل تۋرالى ساۋدا جانە ينتەگراتسيا ۆيتسە-ءمينيسترى جانەل كۇشىكوۆا ايتتى، دەپ حابارلايدى "ادىرنا".
ونىڭ ايتۋىنشا، ءتيىستى شەشىم قازىر ەۋرازيالىق ەكونوميكالىق كوميسسيا الاڭىندا قاراستىرىلىپ جاتىر. بۇل باستاما رەسەيدەگى قازىرگى جاعدايدى ەسكەرە وتىرىپ، ىشكى نارىقتا جانارماي تاپشىلىعى تۋىنداعان جاعدايدا بالاما جەتكىزۋ ارناسىن قالىپتاستىرۋدى كوزدەيدى.
ء«بىز ەۋرازيالىق ەكونوميكالىق كوميسسيا اياسىندا ءۇشىنشى ەلدەردەن، ەڭ الدىمەن قىتايدان جانارماي يمپورتىن ىنتالاندىرۋ ءۇشىن يمپورتتىق كەدەندىك باجداردى تومەندەتۋ تۋرالى شەشىم قابىلداپ جاتىرمىز»، – دەدى ۆيتسە-مينيستر.
جانەل كۇشىكوۆانىڭ سوزىنشە، باج سالىعىن نولگە دەيىن تومەندەتۋ جوسپارلانىپ وتىر. بۇل جانارمايدى كەدەندىك تولەمسىز يمپورتتاۋعا مۇمكىندىك بەرەدى.
جەڭىلدەتىلگەن ءتارتىپ ءبىر جىل بويى كۇشىندە بولادى دەپ جوسپارلانعان. ول بەنزينگە، ديزەل وتىنىنا جانە اۆياتسيالىق جانارمايعا قاتىستى قولدانىلادى. سونىمەن قاتار يمپورت كولەمىنە الدىن الا شەكتەۋ قويىلمايدى. جەتكىزۋ كولەمى ىشكى نارىقتىڭ سۇرانىسىنا قاراي انىقتالماق.
سونىمەن بىرگە قازاقستان جانارمايدى ەلدەن شىعارۋعا قويىلعان شەكتەۋلەردى ساقتايدى. ۆيتسە-ءمينيستردىڭ ايتۋىنشا، مۇنداي شەكتەۋلەر بۇرىننان قولدانىستا جانە ىشكى نارىقتى قامتاماسىز ەتۋ ماقساتىندا ءار التى اي سايىن ۇزارتىلىپ وتىرادى.
قازىرگى تاڭدا رەسەي قازاقستانعا جانارماي جەتكىزەتىن نەگىزگى ەلدەردىڭ ءبىرى سانالادى. الايدا كورشى ەلدەگى مۇناي وڭدەۋ زاۋىتتارىنداعى جوسپاردان تىس جوندەۋ جۇمىستارى مەن ءوندىرىستىڭ قىسقارۋىنا بايلانىستى رەسەيدىڭ ءوزى دە جانارماي تاپشىلىعىنا تاپ بولعان.
بۇعان دەيىن Reuters اگەنتتىگى دەرەككوزدەرگە سىلتەمە جاساپ، رەسەيدە بەنزين ءوندىرىسى وتكەن جىلمەن سالىستىرعاندا شامامەن تورتتەن بىرگە ازايعانىن حابارلاعان. وسىعان بايلانىستى ماسكەۋ كورشى ەلدەردەن قوسىمشا جانارماي ىزدەۋگە ءماجبۇر بولعان. اگەنتتىك مالىمەتىنشە، رەسەي قازاقستاننان شامامەن 50 مىڭ توننا اي-92 ماركالى بەنزين جەتكىزۋدى سۇراعان. الايدا قازاقستان تاراپى قازىرگى ۋاقىتقا دەيىن رەسەي تاراپىنان بۇل ماسەلەگە قاتىستى رەسمي ءوتىنىش تۇسپەگەنىن ايتتى.
