قازاقستاننىڭ ەنەرگەتيكا ءمينيسترى ەرلان اقكەنجەنوۆ رەسەيدىڭ ءوز ەلىندەگى جانارماي تاپشىلىعىنا بايلانىستى قازاقستاننان وتىن جەتكىزۋدى سۇرادى دەگەن اقپاراتقا پىكىر ءبىلدىردى، دەپ حابارلايدى "ادىرنا".
ءمينيستردىڭ ايتۋىنشا، قازىرگى ۋاقىتقا دەيىن رەسەي تاراپىنان بۇل ماسەلەگە قاتىستى رەسمي ءوتىنىش تۇسپەگەن.
«رەسەي فەدەراتسياسىنان رەسمي ساۋال تۇسكەن جوق»، – دەدى ەرلان اقكەنجەنوۆ ۇكىمەت كۋلۋارىندا.
سونىمەن قاتار مينيستر مۇنداي ءوتىنىش بولا قالعان جاعدايدا، قازاقستان ونى بەلگىلەنگەن تارتىپپەن قارايتىنىن ايتتى.
بۇل مالىمدەمە ساۋدا جانە ينتەگراتسيا مينيسترلىگىنىڭ قازاقستاننىڭ ءۇشىنشى ەلدەردەن، ەڭ الدىمەن قىتايدان جانار-جاعارماي ماتەريالدارىن كەدەندىك باجسىز يمپورتتاۋ مۇمكىندىگىن قاراستىرىپ جاتقانى تۋرالى حابارلاماسىنان كەيىن جاسالدى.
جوسپارعا سايكەس، جەڭىلدەتىلگەن رەجيم بەنزين، ديزەل وتىنى جانە اۆياتسيالىق وتىنعا قولدانىلۋى مۇمكىن. يمپورت كولەمى الدىن الا شەكتەلمەيدى، قاجەتتىلىككە قاراي انىقتالماق.
سوڭعى كۇندەرى رەسەيدە جانارماي تاپشىلىعى تۋرالى اقپاراتتار جيىلەپ كەتتى. Forbes باسىلىمىنىڭ مالىمەتىنشە، 23 ماۋسىمداعى جاعداي بويىنشا رەسەيدىڭ 89 ءوڭىرىنىڭ 61-ىندە جانارماي قۇيۋ ستانتسيالارىندا بەنزين مەن ديزەل ساتۋعا ءتۇرلى شەكتەۋلەر ەنگىزىلگەن. كەي وڭىرلەردە ءبىر ادامعا 20–40 ليتردەن ارتىق جانارماي ساتىلماسا، ديزەل وتىنىنا دا كولەمدىك شەكتەۋلەر قويىلعان. كەيبىر جانارماي قۇيۋ ستانتسيالارىندا كەزەك پەن تالون جۇيەسى ەنگىزىلگەن.
وڭىرلىك بيلىك بۇل شارالار نارىقتاعى دۇربەلەڭ مەن الىپساتارلىقتىڭ الدىن الۋ ماقساتىندا قابىلدانعانىن مالىمدەدى.
ال قازاقستاندا جانارماي تاپشىلىعى جوق. بۇعان دەيىن پرەمەر-مينيستر ولجاس بەكتەنوۆ ىشكى نارىق تولىق قامتاماسىز ەتىلىپ وتىرعانىن ايتقان بولاتىن. ونىڭ مالىمەتىنشە، ەلدەگى بەنزين، ديزەل جانە اۆياتسيالىق وتىن قورى 1 ميلليون توننادان اسادى.
ۇكىمەت ءبىرىنشى كەزەكتە جانارماي قۇيۋ ستانتسيالارىن، اۋىل شارۋاشىلىعى وندىرۋشىلەرىن جانە وتاندىق اۋە تاسىمالداۋشىلارىن وتىنمەن قامتاماسىز ەتۋگە باسىمدىق بەرىپ وتىر. سونىمەن قاتار مەملەكەتتىك شەكارادا باقىلاۋ كۇشەيتىلىپ، مۇناي ونىمدەرىن زاڭسىز شىعارۋدىڭ الدىن الۋ جانە جانار-جاعارماي ءوندىرىسى مەن قورىنا تۇراقتى مونيتورينگ جۇرگىزۋ تاپسىرىلدى.
سونداي-اق ەنەرگەتيكا مينيسترلىگى بۇعان دەيىن تاراعان قازاقستاندا اۆياتسيالىق وتىن تاپشىلىعى بولۋى مۇمكىن دەگەن اقپاراتتى جوققا شىعارىپ، وتاندىق مۇناي وڭدەۋ زاۋىتتارى ىشكى سۇرانىستى تولىق قامتاماسىز ەتىپ وتىرعانىن مالىمدەگەن ەدى.
