رەسەيدىڭ نيجەگورود وبلىسىندا سۋ-34 اسكەري ۇشاعى اپاتقا ۇشىرادى، دەپ حابارلايدى "ادىرنا" ۇلتتىق پورتالى.
بۇل تۋرالى جەرگىلىكتى باق جاريالادى.
رەسەي قورعانىس مينيسترلىگىنىڭ مالىمەتىنشە، ۇشاق قونۋعا بەت العان كەزدە اقاۋ پايدا بولعان. ەكيپاج مۇشەلەرى كاتاپۋلت جۇيەسىن دەر كەزىندە ىسكە قوسىپ، امان قالعان.
«قارۋ-جاراقسىز ۇشىپ جۇرگەن ۇشاق ەلدى مەكەندەردەن الىس، ادام جوق اۋماققا قۇلادى. زارداپ شەككەندەر جوق»، – دەدى ۆەدومستۆو وكىلدەرى.
ايتا كەتەيىك، بۇل - ءبىر جىلدىڭ ىشىندە رەسەيدە قۇلاعان ءۇشىنشى سۋ-34 ۇشاعى. بۇعان دەيىن 2023 جىلدىڭ ماۋسىم ايىندا سولتۇستىك وسەتيادا وقۋ-جاتتىعۋ كەزىندە سۋ-34 اپاتقا ۇشىراپ، ەكى ۇشقىش قازا تاپقان ەدى. ال 2024 جىلدىڭ شىلدەسىندە ۆولگوگراد وبلىسىندا تاعى ءبىر سۋ-34 جەرگە قۇلاپ، ول كەزدە دە ەكيپاج كاتاپۋلتپەن سەكىرىپ، امان قالعان.
