Qazaqstannyŋ Energetika ministrı Erlan Aqkenjenov Reseidıŋ öz elındegı janarmai tapşylyǧyna bailanysty Qazaqstannan otyn jetkızudı sūrady degen aqparatqa pıkır bıldırdı, dep habarlaidy "Adyrna".
Ministrdıŋ aituynşa, qazırgı uaqytqa deiın Resei tarapynan būl mäselege qatysty resmi ötınış tüspegen.
«Resei Federasiiasynan resmi saual tüsken joq», – dedı Erlan Aqkenjenov Ükımet kuluarynda.
Sonymen qatar ministr mūndai ötınış bola qalǧan jaǧdaida, Qazaqstan ony belgılengen tärtıppen qaraitynyn aitty.
Būl mälımdeme Sauda jäne integrasiia ministrlıgınıŋ Qazaqstannyŋ üşınşı elderden, eŋ aldymen Qytaidan janar-jaǧarmai materialdaryn kedendık bajsyz importtau mümkındıgın qarastyryp jatqany turaly habarlamasynan keiın jasaldy.
Josparǧa säikes, jeŋıldetılgen rejim benzin, dizel otyny jäne aviasiialyq otynǧa qoldanyluy mümkın. İmport kölemı aldyn ala şektelmeidı, qajettılıkke qarai anyqtalmaq.
Soŋǧy künderı Reseide janarmai tapşylyǧy turaly aqparattar jiılep kettı. Forbes basylymynyŋ mälımetınşe, 23 mausymdaǧy jaǧdai boiynşa Reseidıŋ 89 öŋırınıŋ 61-ınde janarmai qūiu stansiialarynda benzin men dizel satuǧa türlı şekteuler engızılgen. Kei öŋırlerde bır adamǧa 20–40 litrden artyq janarmai satylmasa, dizel otynyna da kölemdık şekteuler qoiylǧan. Keibır janarmai qūiu stansiialarynda kezek pen talon jüiesı engızılgen.
Öŋırlık bilık būl şaralar naryqtaǧy dürbeleŋ men alypsatarlyqtyŋ aldyn alu maqsatynda qabyldanǧanyn mälımdedı.
Al Qazaqstanda janarmai tapşylyǧy joq. Būǧan deiın Premer-ministr Oljas Bektenov ışkı naryq tolyq qamtamasyz etılıp otyrǧanyn aitqan bolatyn. Onyŋ mälımetınşe, eldegı benzin, dizel jäne aviasiialyq otyn qory 1 million tonnadan asady.
Ükımet bırınşı kezekte janarmai qūiu stansiialaryn, auyl şaruaşylyǧy öndıruşılerın jäne otandyq äue tasymaldauşylaryn otynmen qamtamasyz etuge basymdyq berıp otyr. Sonymen qatar memlekettık şekarada baqylau küşeitılıp, mūnai önımderın zaŋsyz şyǧarudyŋ aldyn alu jäne janar-jaǧarmai öndırısı men qoryna tūraqty monitoring jürgızu tapsyryldy.
Sondai-aq Energetika ministrlıgı būǧan deiın taraǧan Qazaqstanda aviasiialyq otyn tapşylyǧy boluy mümkın degen aqparatty joqqa şyǧaryp, otandyq mūnai öŋdeu zauyttary ışkı sūranysty tolyq qamtamasyz etıp otyrǧanyn mälımdegen edı.
