اقش العاش رەت ءوزىن ۋكراينا قاقتىعىسىنداعى بەيتاراپ دەلدال ەمەس، كيەۆتىڭ تىكەلەي سەرىكتەسى رەتىندە مويىندايتىن قۇجاتتى ماقۇلدادى. بۇل تۋرالى فرانتسيا پرەزيدەنتى ەممانۋەل ماكرون يتاليا پرەمەر-ءمينيسترى دجوردجا مەلونيمەن وتكەن بىرلەسكەن ءباسپاسوز ءماسليحاتىندا ايتتى، دەپ حابارلايدى "ادىرنا" ۇلتتىق پورتالى ربك باسىلىمىنا سىلتەپ.
ماكروننىڭ ايتۋىنشا، G7 ءسامميتى اياسىندا قابىلدانعان قۇجاتتار اقش پەن ەۋروپا اراسىنداعى ىنتىماقتاستىقتىڭ قايتا نىعايىپ كەلە جاتقانىن كورسەتەدى.
«اقش العاش رەت ءوزىن بەيتاراپ دەلدال ەمەس، ۋكراينانىڭ اۋماقتىق تۇتاستىعىن قولداۋ، اسكەري جانە ەنەرگەتيكالىق كومەك كورسەتۋ، سونداي-اق رەسەيگە قارسى سانكتسيالار ماسەلەسىندە ءبىزدىڭ سەرىكتەسىمىز ەكەنىن ايقىندايتىن ماتىنگە قول قويدى»، – دەدى فرانتسيا پرەزيدەنتى.
G7 ەلدەرىنىڭ كوشباسشىلارى سامميت قورىتىندىسى بويىنشا ۋكرايناعا قولداۋدى جالعاستىرىپ، رەسەيگە قاتىستى سانكتسيالىق قىسىمدى كۇشەيتۋگە نيەتتى ەكەنىن راستادى.
تاراپتار ۋكرايناعا اۋە شابۋىلىنا قارسى قورعانىس قۇرالدارىن، قوسىمشا قارۋ-جاراق پەن الىس قاشىقتىققا سوققى بەرەتىن جۇيەلەردى جەتكىزۋدى ارتتىرۋعا، سونداي-اق اسكەري ءوندىرىستى كەڭەيتۋ ءۇشىن جەڭىلدەتىلگەن ليتسەنزيالار بەرۋ مۇمكىندىگىن قاراستىرۋعا كەلىستى. بىرلەسكەن مالىمدەمەدە رەسەيگە قارسى جاڭا شەكتەۋ شارالارىن ەنگىزۋگە دايىن ەكەنى دە اتاپ ءوتىلدى.
G7 قۇرامىنا اقش، كانادا، ۇلىبريتانيا، گەرمانيا، فرانتسيا، يتاليا جانە جاپونيا كىرەدى.
بۇعان دەيىن «ۋكراينسكايا پراۆدا» باسىلىمى ۋكراينا پرەزيدەنتى ۆلاديمير زەلەنسكي كەڭسەسىندەگى دەرەككوزدەرگە سىلتەمە جاساپ، كيەۆ ۆاشينگتوننىڭ قاقتىعىستى رەتتەۋ جونىندەگى كەلىسسوزدەردەگى ءرولىن تىم باسەڭ دەپ باعالايتىنىن جازعان.
باسىلىمنىڭ مالىمەتىنشە، دونالد ترامپ اق ۇيگە ورالعاننان كەيىن اقش ۋكراينا وداقتاسى رولىنەن تاراپتار اراسىنداعى دەلدال رولىنە اۋىسقان. سوڭعى ايلاردا كيەۆ ۆاشينگتوننىڭ قاقتىعىستى رەتتەۋ پروتسەسىنە بەلسەندىرەك قاتىسۋىنا ىقپال ەتۋگە تىرىسقان.
ال Bloomberg اگەنتتىگىنىڭ حابارلاۋىنشا، ەۋروپالىق وداق كوشباسشىلارى G7 ءسامميتىن پايدالانىپ، دونالد ترامپتى رەسەي مەن ۋكراينا اراسىنداعى كەلىسسوزدەردىڭ جاڭا كەزەڭىن قولداۋعا كوندىرۋگە ۇمىتتەنگەن.
2025 جىلدىڭ كوكتەمىندە دونالد ترامپ ۋكرايناداعى سوعىس ءۇشىن جاۋاپتى ەمەس ەكەنىن ايتىپ، قاقتىعىستى رەتتەۋ باعىتىنداعى جۇمىستى جالعاستىرىپ جاتقانىن مالىمدەگەن بولاتىن. سونىمەن قاتار ول سوعىستىڭ باستالۋىنا ۋكراينا پرەزيدەنتى ۆلاديمير زەلەنسكي مەن اقش-تىڭ بۇرىنعى پرەزيدەنتى دجو بايدەندى كىنالاعان.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ ماۋسىم ايىندا ترامپ پەن ونىڭ كومانداسى قاراما-قايشى مالىمدەمەلەرىنە قاراماستان، ۋكرايناداعى بەيبىتشىلىككە شىن نيەتپەن ۇمتىلىپ وتىرعانىن ايتقان.
ماسكەۋ بىرنەشە رەت كيەۆكە اسكەري كومەك كورسەتۋ سوعىستىڭ اياقتالۋىن تەك سوزادى دەگەن ۇستانىمىن ءبىلدىرىپ، مۇنداي قولداۋعا قارسى ەكەنىن مالىمدەگەن. سونداي-اق رەسەي باتىستىڭ سانكتسيالارىن ايىپتاپ كەلەدى. دميتري پەسكوۆتىڭ سوزىنشە، رەسەي ەكونوميكاسى كوپتەگەن شەكتەۋلەر جاعدايىندا جۇمىس ىستەۋگە بەيىمدەلىپ، سانكتسيالارعا بەلگىلى ءبىر دەڭگەيدە «يممۋنيتەت» قالىپتاستىرعان.
