АҚШ алғаш рет өзін Украина қақтығысындағы бейтарап делдал емес, Киевтің тікелей серіктесі ретінде мойындайтын құжатты мақұлдады. Бұл туралы Франция президенті Эммануэль Макрон Италия премьер-министрі Джорджа Мелонимен өткен бірлескен баспасөз мәслихатында айтты, деп хабарлайды "Адырна" ұлттық порталы РБК басылымына сілтеп.
Макронның айтуынша, G7 саммиті аясында қабылданған құжаттар АҚШ пен Еуропа арасындағы ынтымақтастықтың қайта нығайып келе жатқанын көрсетеді.
«АҚШ алғаш рет өзін бейтарап делдал емес, Украинаның аумақтық тұтастығын қолдау, әскери және энергетикалық көмек көрсету, сондай-ақ Ресейге қарсы санкциялар мәселесінде біздің серіктесіміз екенін айқындайтын мәтінге қол қойды», – деді Франция президенті.
G7 елдерінің көшбасшылары саммит қорытындысы бойынша Украинаға қолдауды жалғастырып, Ресейге қатысты санкциялық қысымды күшейтуге ниетті екенін растады.
Тараптар Украинаға әуе шабуылына қарсы қорғаныс құралдарын, қосымша қару-жарақ пен алыс қашықтыққа соққы беретін жүйелерді жеткізуді арттыруға, сондай-ақ әскери өндірісті кеңейту үшін жеңілдетілген лицензиялар беру мүмкіндігін қарастыруға келісті. Бірлескен мәлімдемеде Ресейге қарсы жаңа шектеу шараларын енгізуге дайын екені де атап өтілді.
G7 құрамына АҚШ, Канада, Ұлыбритания, Германия, Франция, Италия және Жапония кіреді.
Бұған дейін «Украинская правда» басылымы Украина президенті Владимир Зеленский кеңсесіндегі дереккөздерге сілтеме жасап, Киев Вашингтонның қақтығысты реттеу жөніндегі келіссөздердегі рөлін тым бәсең деп бағалайтынын жазған.
Басылымның мәліметінше, Дональд Трамп Ақ үйге оралғаннан кейін АҚШ Украина одақтасы рөлінен тараптар арасындағы делдал рөліне ауысқан. Соңғы айларда Киев Вашингтонның қақтығысты реттеу процесіне белсендірек қатысуына ықпал етуге тырысқан.
Ал Bloomberg агенттігінің хабарлауынша, Еуропалық одақ көшбасшылары G7 саммитін пайдаланып, Дональд Трампты Ресей мен Украина арасындағы келіссөздердің жаңа кезеңін қолдауға көндіруге үміттенген.
2025 жылдың көктемінде Дональд Трамп Украинадағы соғыс үшін жауапты емес екенін айтып, қақтығысты реттеу бағытындағы жұмысты жалғастырып жатқанын мәлімдеген болатын. Сонымен қатар ол соғыстың басталуына Украина президенті Владимир Зеленский мен АҚШ-тың бұрынғы президенті Джо Байденді кінәлаған.
Ресей президентінің баспасөз хатшысы Дмитрий Песков маусым айында Трамп пен оның командасы қарама-қайшы мәлімдемелеріне қарамастан, Украинадағы бейбітшілікке шын ниетпен ұмтылып отырғанын айтқан.
Мәскеу бірнеше рет Киевке әскери көмек көрсету соғыстың аяқталуын тек созады деген ұстанымын білдіріп, мұндай қолдауға қарсы екенін мәлімдеген. Сондай-ақ Ресей Батыстың санкцияларын айыптап келеді. Дмитрий Песковтың сөзінше, Ресей экономикасы көптеген шектеулер жағдайында жұмыс істеуге бейімделіп, санкцияларға белгілі бір деңгейде «иммунитет» қалыптастырған.
