قازاقستاندىق اكتەر سانۇرجان سۇلەيمەن اقش-تا ورتەنىپ جاتقان كولىكتەن ءبىر ادامدى قۇتقارىپ الدى، دەپ حابارلايدى «ادىرنا» ءتىلشىسى.
وقىس وقيعا لوس-اندجەلەس قالاسىنىڭ ماڭىندا بولعان. كۋاگەر ايدانا ءساحاريدىڭ ايتۋىنشا، كولىك جاردان شىعىپ كەتىپ، ورتەنىپ كەتكەن. بۇل جاعدايدى كورگەن سانۇرجان جانىپ جاتقان كولىككە جۇگىرىپ بارىپ، زارداپ شەككەن ەر ادامدى سىرتقا الىپ شىققان.
قۇتقارۋ قىزمەتتەرى ءبىراز ۋاقىتتان كەيىن وقيعا ورنىنا كەلىپ جەتىپ، زارداپ شەككەن جۇرگىزۋشىگە العاشقى مەديتسينالىق كومەك كورسەتكەن.
«ەستە قالار كۇن بولدى. ءبارى جاقسى. جاراقات العان جوقپىن. ومىرىمىزگە جاۋاپكەرشىلىك الا ءبىلىپ، ءبىر-بىرىمىزگە قامقور بولايىقشى»، - دەپ جازدى اكتەر الەۋمەتتىك جەلىدەگى پاراقشاسىندا.
ايتا كەتەيىك، سانۇرجان سۇلەيمەن 1998 جىلدىڭ 9 ساۋىرىندە الماتى قالاسىندا دۇنيەگە كەلگەن. كوپشىلىككە «اڭشى بالا»، «رايونى»، «شەستوي پوست»، «ۆرەميا پاتريوتوۆ» سياقتى جوبالار ارقىلى تانىلدى.
